1. yle.fi
  2. Uutiset

Tänäpäi algau saamen kielien nedäli – varavonalastu kieldy livutetah käyttämäh hos syömislistas

Kanzallizel da kanzoinvälizel saamen kielien nedälil paiči muudu joga päiviä jullatah uuzi saamekse normiiruittu sana.

Yle Uudizet karjalakse
Yle Areena, Yle Sápmi, Yle Areena Sápmi
Yle Arienas saamenkielisty programmua voit löydiä kirjuttamal eččokentäh "sápmi".Linda Tammela / Yle

Tänäpäi algau kanzalline da kanzoinväline saamen kielien nedäli. Nedälin tarkoituksennu on paiči muudu suaja saamen kielile enäm nägövytty da ližätä tieduo niilöis kielis.

Suomen saamelazien suudo pidäy nedälin yhtesruavos Norvegien da Ruočin saamelazien suudoloinke. Kielinedälin pidäjät tahtottas, gu sen hantuzis saamen kielii käytettäs kaikil yhteskunnan oza-alovehil. Nenga hyö livutetah luadimah ezimerkikse syömislistua libo rekluamua miltahto saamen kielel. Tervehtimine saamekse sežo kuuluu nedälin tiemah.

Kai saamen kielet ollah varavonalazet. Vuitti kielis on ylen varavonalaine libo läs sambunuh. Kaikkiedah niidy nygöi on yheksä libo kymmene. Miäry rippuu sit, piettänehgo Ven’an alovehele sijoittujua akkalansaamen kieldy sambunuonnu vai ei. Suomes paistah kolmeh saamen kieleh: pohjassaamekse, inarinsaamekse sego kol’tansaamekse.

Äijät saamelazet ruadajat organizuijah programmua enimite verkos kielinedälin hantuzis.

Uuttu sanua da kielikylyy

Sámi Giellagáldu libo suomekse Saamen Kielikaltio on toimielin, kudai piättäy paiči muudu uuzien sanoin normiiruičendas kielih da luadiu uuttu terminolougiedu. Saamen kielien nedälil se julguau omal Facebook-sivul joga päiviä uvven, normiiruitun sanan.

– Net ollah aijankohtazet sanat, kuduat liitytäh tämänkodvazeh tilandeheh. Sanat aiga hyvin kuvatah uuttu aigua da yhteskundua, nenga sanoi kieliazieloinsekretari Marko Marjomaa Buorre iđit Sápmi -radivolähetykses piätteniččän.

Saamen kielis kiinnostunnuzih niškoi pietäh avvonazii loitto-opastusčuassuloi kielikylyn muvvos. Opastusčuassuloin aigua Oppitunneilla(siirryt toizeh palveluh) (siirryt toiseen palveluun) pyrritähes tuttavuttamah da virittämäh rahvastu saamen kielih.

Deanuleagis sámástit -projektan tarkoituksennu on hoidua Tenonlaakson murrehtu da alovehen perindötieduo. Projektan vuitinnu organizuijah ezimerkikse paginpido, kus saamen kielen professoru Ante Aikio da maltajat vastatah kielikyzymyksih.

Saamenkielisty programmua Yle Arienas

Yle Arienas löydyy saamenkielisty tv-dai radivoprogrammua. Arienan Sápmi-sivule on kerätty sežo saamenkielisty programmua lapsih niškoi sego arhiivuprogrammua kolmel saamen kielel.

Argipäivin Yle TV1 -kanualal nägyjät Yle Ođđasat tullah samazele sivule.

Tänään alkaa saamen kielten viikko – uhanalaista kieltä haastetaan käyttämään vaikka ruokalistassa

Lue seuraavaksi