1. yle.fi
  2. Uutiset
  3. Lyhyet

Guldal ja geahča: Sámis goardi báhkas, ná olbmot návddašit geasis

Lappi guovlu lei vuossárgga olles Suoma báhkkasamos báiki. Olbmot leat návddašan dálkkis, muhto muhtumat leat maid healkkehan báhkkasis.

Lapset uimassa Ahvenjärvellä

Dán vahkku goardi báhkat ollejedje Sápmái. Sihke báikkálaččat ja turistat leat návddašan geassedálkkis olgun.

Gávccát luohkkái manni avvillaš Ellen Tervahauta lei ikte vuossárgga velohallamin Avvila sáttogáddis skihpáriiguin. Musihkka čuojadettiin nieiddat herskkostalle ja návddašedje beaivvážis.

Tervahauta muitala, ahte báhkaid dihte lea sáhttán bargat vaikko manlágan áššiid. Nieiddat leat earet eará vuojadan, speallan doaškunspáppa ja velohallan beaivvážis. Čuovvovaš beaivve plánan lea vuolgit meallut SUP-paddleboardain.

Guhttáslaš Ebba Valkeapää mielas badjel 30 lieggagráda lea menddo olu. Son mieđiha, ahte 22 lieggagráda lea buoremus geassedálki, go dalle bivvá maiddái vuojadit jus lea beaivvádat.

– Ii leat somá jus lea nu báhkas, ahte šaddá heajos dilli, muhto lea somá vuojadit go lea báhkas, muitala Valkeapää.

Linnea Labba fas dovdá, ahte dál ii leat menddo báhkka. Ahvenjávrris vuojadeaddji mánáid mielas buoremus čoaskudanvuohki lea vuojadeapmi.

Olbmuid lassin maiddái elliide lea lossat dákkár báhkat. Sunna Nousuniemi lea oastán su beatnagii Mattakii čeabetbiktasa, mii doallá su gálmmasin. Nousuniemi muitala, ahte galbma čáhci, mainna doidá čeabetbátti, veahkeha beatnaga. Galbma liidni galggašii veahkehit várragierddu ja ná eastit su guhkesguolggat beatnaga heavganeamis.

– Dalle go lea báhkka beaivi, moai bisso siste, dadjá Nousuniemi ja stelledallá liinni Mattak čeabeha birra.

Sámi guovllu sáttogáttit dohkkejit maiddái Suoma turisttaide

Avvila sáttogátti biilaguođáhat lei dievva go báikkálaččaid lassin maiddái turistat ledje gávdnan dohko. Sivvan dasa soaitá leat Madventures -TV -ráiddu listejupmi, gos Avvila sáttogáddi merkejuvvui Suoma gávccádin buoremus gáddin.

TV-ráiddus oahpis Riku Rantala ja Tunna Milonoff muitaledje sudno ođamus girjjis Madventures Suomi: Matkaopas (Johnny Kniga 2020) sudno mielas Suoma buoremus sáttogáttiid.

Vuossárgga Sápmi lei Suoma báhkkasamos báiki ja Ohcejoga Geavus mihtidedje 33,6 lieggagráda veaigin diibmu 17 áigge. Dat lohku lea Lappi guovllu geasi alimus temperatuvra ja dat olahii measta obba Suoma báhkkasamos lohkanárvvuid. Maŋimuš Lappi rekorda lei 1960-logus 33,4 lieggagráda.