Hyppää sisältöön

Runopajo pädöy tähgi päiväh – tutkii-muzikantu Taito Hoffrén: ”Yhtenjyttymät perimäzet kyzymykset muokatah rahvastu iellehgi”

Kuhmon Juminkevos tänäpäi pietäh perindölline Arhippa Perttunen -simpouzium. Vienan runoneroniekakse mainittu Arhippa Perttunen on Kalevalan syväindöh enämbäl muidu vaikutannuh runonpajattai.

Tutkii-muzikantu Taito Hoffrén on olluh virinnyh Arhippa Perttuzen runopajoh jo nenga kahtenkymmenen vuvven aijan. Kuva rahvahanmuuzikan pruazniekas Sommelos vuvvel 2015 Kuva: Amanda Kauranne

Kuhmon Juminkevos tänäpäi ezmässargen pietäh perindölline Arhippa Perttunen –simpouzium. Pidoh ottau ozua luvendonpidäjänny Kalevalah liittyjiä kul’tuuruperindyö hoidajan Juminkeko-fondan uuzi paginanvedäi, tutkii-muzikantu Taito Hoffrén.

Häi parahite luadiu taijollistu dohtorututkinduo Kalevalan syväindöh enämbäl vaikutannuon, Vienan runoneroniekakse mainitun Arhippa Perttuzen runopajos. Tutkimuksen tavoittehennu on runopajokielen ečindy Arhippa Perttuzen runopajoloin kauti.

Hoffrén on sežo ainavo muzikantu, kudai on pajatannuh kai Arhipan runopajot omis konsertois, kudamua oli kaikkiedah 12.

– Se on moine muailmu, kudai kaččelou ylen levieh kaiken eloksen kirjavuttu. Materjualan miäry oli moine suuri, ga tundui, buitegu et sidä nikonzu kačo loppussah. Olin ihan uvven dielon rinnal, hos ylen vahnas dieloshäi on pagin, nenga sanou Hoffrén oman kiinnostuksen taga-aloih näh.

Hoffrén sanelou, gu häi on tahtonuh opastuo runopajokieleh da tabah, mih runonpajattai sidä luadiu, enne gu iče on lähtenyh azumah uvvembua tekstua da runorivilöi. Omis runopajolois häi tahtou kačella tiemoi, kudamat ollah lähäl omua eloksenpiirii.

– Tämä kevät oli tovengi poikkevus, sendäh gu duumaičin, luadinengo pajon voinah näh, se oli yhtelläh kaikkien mieles piälimäzenny. Otin laihinakse pajoh vai meijän prezidentan sanomizii, sendäh gu olen luadinuh runopajon Ukrainan voinah näh jo vuvvennu 2014. Se pädis hyvin nygöi tähgi keviäh.

Hoffrénan mugah runopajot ollahgi nygöi mugaže aijankohtazet, kui net oldih 200 vuottu tagaperin.

– Yhtenjyttymät perimäzet kyzymykset muokatah rahvastu iellehgi. Olemmo yhteh luaduh tiedämättömät tänä piän äijäs dielos, kui Arhippagi omal aigua.

Juminkeko-fondu on pidänyh Arhippa Perttunen -simpouziumua vuvves 2003 algajen joga vuottu. Mulloi koronatilandehen täh pido organizuittih loitoči. Tänä vuon tapahtumua voit kaččuo paikal libo loittuopäi Juminkevon Youtube-kanualal Youtube-kanavalla(siirryt toizeh palveluh) (siirryt toiseen palveluun).