yle.fi-etusivu

Oldanehgo rauhoitettuloi hanhiloi ammuttu jovel pilgopimies prožektoroin loškottajes?

Kondivolahtelazen kylän rannal eläjät ollah sidä mieldy, gu täl sygyzyl Pielisjovel on ammuttu vezilinduloi.

Yle Uudizet karjalakse
Pielisjoen syksyistä rantamaisemaa Kontiolahden Kupluskylän kohdalla.
Täl sygyzyl Pielisjovel, Jovensuun da Kondivolahten rajoil, vikse on zakonattomasti ammuttu vezilinduloi.Jouki Väinämö / Yle

Päivänlaskupuolizel rannal sijaiččijan Kupluskylän eläjät sanellah, gu täl sygyzyl mečästyskieldoalovehel kuului ammundua pilgopimies prožektoroin loškottajes. Rannal eläi Hilppa Kukkonen sanou, gu mečästäjät ollah ammuttu rauhoitettuloi hanhiloi.

Jälgimäine tapahtus oli Kaunisniemen da Kulhossellän kohtas ligakuus.

”Hanhiloi ei sua ambuo!”

Hilppa Kukkonen sanelou, gu se oli 20 aigah. Ezmäi pilgopimies ozutettihes prožektoroin vallot da sit kuului ammundua.

– Oli ihan pilgopimei. Nägyi yhten libo kahten prožektoran valguo. Juuri siepäi ketlienne ruvettih ambumah meččyhanhiloi. Niidy oli sie suuri parvi lendoh nossuh.

Misbo tiijät, gu net oldih meččyhanhet?

– Minä tunnistin iänes. Meččyhanhel on hillembi iäni, migu valgošokkuhanhel.

Hilppa Kukkonen ilmoitti mečästäjile, gu hyö ruatah pahua zakonattomua dieluo.

– Kirruin heile, gu hanhiloi ei sua ambuo. Hanhet särähtettihes da lennettih täh meijän randah turvah. Ilmoitin mečästäjile, gu olen soittanuh policieh.

”Voit varata oman hengen da tervehyön puoles”

Hilppa Kukkonen sanelou, gu heijän kohtas ollah läs hävitty sorzat. Tänä kezän häi on nähnyh jovel vai kolme sorzua.

Kukkozen ližäkse muutgi eläjät ollah kirruttu vakkinazien mečästäjien peräh. Täs pimeis dielos policiele on luajittu kaksi ilmoitustu.

– Tädä on olluh alalleh jo monen vuvven aigua, kerran tiä ei ole nimitustu vardoičustu.

Hilppa Kukkozen mieles Pielisjovel pidäs kokonah kieldiä vezilinduloin ammundu.

–Mečästyskieldo pidäs olla, sendäh gu tämä on kui diikois päivänlaskupuoles. Nygöi voit varata oman hengen da tervehyön puoles, konzu tullah tänne ambumah.

Jovensuun keskučaspäi matkua Kupluskyläh on läs kaheksua kilometrii. Pielisjoven päivänlaskurandua pitkin Jogirannantien varrel nygöi on eländypaikkua. Mugaže on sežo Kulhon puolizel rannal.

Ollougo riähkiä enämbigi?

Oldaneh eläjät oigiet, Pielisjovel on mečästetty zakonattomasti jo kai puolenkymmendy kerdua.

Konzu mečästäjät ammuttih Kukkozien taloin vastahizel rannal, matkua kyläh oli enämbi, migu zakonas on sanottu libo 150 metrii.

Mečästyksen eettizih ohjavoloih yhtelläh kuuluu vältiä mečästysty taloloin da duačoin lähäl. Se on varattavu dielo, konzu mečästäi ambuu vezilinduloi vintoukas eländypaikoin lähäl.

Nähtyn mugah mečästäjät ammuttih rannalpäi, kus vezilinduloin ammundu on kielletty.

Pilgopimies ei sua ambuo. Oletetah, gu riistua ei sua tunnistua, konzu mečästäi ei näi nimidä.

Sidä paiči mečästykses on kielletty prožektoroin käyttö.

Gu vai Pielisjovel oldaneh ammuttu meččyhanhiloi, se on rikos, sendäh gu meččyhanhi on rauhoitettu. Rauhoitetut ollah sežo Kulhonselläl täl sygyzyl suurinnu parviloinnu huogavunnuot valgošokkuhanhet.

Luve sežo

Rauhoitettuja hanhia ammuttu joella säkkipimeässä valonheittimien loisteessa?