yle.fi-etusivu

Kevät tulou! Pohjazesgi roih lämmiä, siitehpölyy da viennouzuu

Koivun siitehpölyy on äijy enimite Suvi-Suomes. Tulii nedälinloppu roih ylen lämmin.

Yle Uudizet karjalakse
Laulujoutsenia huhtikuisena päivänä.
Laulujouččenet sulakuulIsmo Pekkarinen / AOP

Tulii nedälinlopu roih tämän keviän kaikii lämmembi. Yhtelläh ihan räkki ei rodei, ga Ylen meteorologan Kerttu Kotakorven mugah suves roih jo 20 astehessah lämmiä.

– Samazel aigua pohjazilgi alovehil voibi roita lämmiä nenga 15 astehtu. Muan keskičuris vihman täh voibi olla vähästy vilumbi.

Suovattan roih poudu kogo muas, hos Kotakorven mugah pohjazeh tulougi jo vähäine vilumbastu ilmua.

– Suovattan da pyhänpiän muan suvi- da keskičuris on aiga ylellizesti nenga 15–20 astehtu lämmiä.

BirdLife Suomen mugah sežo linduloin keviälline muutto on piässyh raviembah vauhtih. Suvi-Suomes on jo äijy pajulinduu da tervupiäsköidy. Birdlifen tiijoittajan mugah kolmaspäivy oli hanhiloin piämuuttopäivy da Porkkalan taivahas on nähty kai piäl suantuhanden hanhen.

Kačo animacies, kui ilmu lämbiey nedälin lopus.

Koivus allergiedu suves da pohjazes

Koivu kukkiu täytty vägie Suvi-Suomes, sanou Turun yliopiston siitehpölytiijoitus. Siitehpölyn miäriä roih enämbi muan suvičuris da vähembi muan keskičuris.

Pohjazembas Suomes sežo on pienii miärii koivun siitehpölyy. Vaasan alovehel siitehpölyy ei ole ylen äijiä. Allergikkoloi muakkuau sežo Ruočispäi da Baltiespäi tulii siitehpöly.

Lepäle allergizien dielot ollah parembat. Leppy on heittämäs kukindua muan keskičuris da sidä on vähembi Pohjas-Suomesgi.

Nedälin vaihtujes viennouzuu pohjazen jogilois

Suomen ymbäristökeskuksen mugah vuitis pohjazen jogilois roih viennouzuu jo tulien nedälin vaihtujes. Virduamine roih rutto vähimyölleh Pohjas-Pohjanmuan da Lapin rajal Kuivu- da Simojovel sego Iijovel da viennouzu zavodih sie jo nedälin vaihtujes.

Probliemua voibi roita sežo jiäpadolois. Kevätpäiväine jo on ehtinyh sulattua enimät jogijiät da Suomen ymbäristökeskuksen mugah suurien jiäpadovahingoloin mahto on pieni.

Yhtelläh pahembi viennouzu voibi olla vie iel. Iijoven viennouzu on suurembi oraskuun lopus. Korgiembale nouzijoil Jongunjärvel da Pudasjärvel vezi voibi katkuo paikallizii dorogoi libo kai koskie taloloigi, kuduat sijaijah vien lähäl.

Luve sežo

Kevät saapuu toden teolla! Lämpö nousee, siitepöly kiusaa ja tulvat uhkaavat pohjoisessa