yle.fi-etusivu

Markkazes vuotetah ylen hyviä kižua: ”Nimittustu ekstrapainehtu!”

Lauri Markkazes vuotetah ylen hyviä ezitysty Susijengin EM-kižois Helsingis da häi on valmis sih.

Yle Uudizet karjalakse
Lauri Markkanen kuvassa
Tomi Hänninen

Lauri Markkazes on roinnuh Suomen supertiähti verkopezämiäčyn EM-kižoin Helsingin algulohkos. Markkazel on olluh piättäi rouli Susijengin kižois. Lauri Markkanen tiedäy, gu hänes vuotetah ylen hyviä ezitysty Susijengin EM-kižois Helsingis da häi on valmis sih.

– En ota nimittustu ekstrapainehtu. Olen vai valmis kižuamah da uskon omah ičceh sego joukkoveheh. Olen äijän opastunnuh Slovenia-ottelun omas pahas ozas da harjaitelluh nengozih tilandehin niškoi, sanoi Markkanen.

Slovenia-kižan jälgimäzien sekundoin aigua Markkanen satatti jallan da rammičči iäres kentälpäi. Ylen pahua yhtelläh ei roinnuh, da Markkanen oli raviennu jo pyhänpiän ehtäl Suomen da Pol’šan kižas.

– Minun jalgu nygöi on ihan hyväs kunnos, hos vähäzel vie tundui kibiedy egläzen kižan aigua. Yhtelläh kižain eigo nimittuine viga olis voinnuh ajua minuu iäres kentälpäi oman rahvahan iespäi. Meil tiä on hyvätazoine huoldojoukko.

Jatkunou kehitys yhtenjytyi kui nygöi, Markkastu vuottau ylen hyvä tulii aigu Chicago Bullsan NBA-joukkovehes. Markkazen ezitykset EM-kižois on nähty Pohjas-Amerikangi čuras.

– Chicago Bullsan abulastreeneru kävyi kaččomah minun kižuandua tiä Helsingis. Olen kuulluh hänes äijän pozitiivistu sanua sego konstruktiivistu ehoitustu. Enämbän olen kuulluh hyviä, migu pahua, sanoi Markkanen.

Markkanen passiboičči joukkovehtu da Susijengin treeneroi.

– Suuret passibot joukkovehdovarišoile sidä, gu hyö ollah luajittu minulleni kižates hyviä lykkävökohtua. Minun dielo oli vai lykätä miäččy verkopezäh. Tahtozin passiboija sežo treeneroi, kuduat ollah annettu minule mahton ozittuo kižas, sanoi Markkanen.

Markkazen da Susijengin EM-kižat jatkutah tossargen ottelul Greciedu vastah.

– Olen hyväs mieles, gu myös piäzen kižuamah verkopezämiäččyh. Toivozin, gu en puuttus enämbiä jatkoaijale. Opin luadie kai jo varzinazen kižan aigua, muheloittau Markkanen.

Luve sežo

Ilmiömäiset esitykset tuoneet valtavat odotukset Markkasen niskaan: "En ota mitään ekstrapaineita"