yle.fi-etusivu

Harvinaine valgei must’oi on varvikkoloin kummalline n’amu

Suvi-Hämien luonnonvardoičuspiiri keriäy starinua, reseptua da kaikenualastu tieduo valgieh must’oih näh. Valgiedu must’oidu kazvau Kandu-Hämies vähimyölleh Hauhol da Tuulokses.

Yle Uudizet karjalakse
Valkoisia mustikoita varvikossa
Martti HIrvonen

Suvi-Hämien luonnonvardoičuspiiri parahite on keriämäs tieduo valgieh must’oih näh.

Must’oin valgei luadu on moine harvinaine, ga kai puolen vuozisadua meččii myöte kävellyh luonnonvardoičuspiirin alovehsekretari Karri Jutila enzimäzen kerran nägi kummallizen muarjan vaste mulloi sygyzyl.

– Valgiedu must’oidu on löydynyh Kandu-Hämies Hauhol da Tuulokses, ga on sidä sežo muijalgi Suomes. Meil on tieduo jo läs kahtehkymmeneh valgien must’oin kazvandukohtah näh.

Jygei on sanuo, min vuoh se luonnos eläy.

Karri Jutila

– Must’oin valgei väri on perindölline viga, kudai toistuu vuvves toizeh, sanelou Karri Jutila. Sit, konzu valgien must’oin varbu menöy vahnakse, se häviey da vieres kazvai tavalline must’oi koppuau sen kohtazen. Jygei on sanuo, min vuoh se luonnos eläy.

Valgies must’ois ei ole sidä muzavansinisty väriainehtu geenoin muutoksen täh.

– Valgieh värih kaččomattah must’oi on magei. Sidä paiči varbu on vihandu, kui mustalgi must’oil. Toizin sanoin, se ei ole albiino, kudual ei olis ni yhty pigmentua, sanou Karri Jutila. Vihandu väri on tärgei yhtevyttämizen kannal.

Ollougo hil’l’aine leviemäh?

Vois duumaija, gu valgei must’oi olis ravei leviemäh, sendäh gu sen näit varvikos kebjiembäh, migu tavallizet must’oit. Toinah linnutgi n’okitah mostu muarjua rutombah, migu muidu. Ga eibo muga ole, duumaiččou Karri Jutila.

– Tämä vikse on toistunuh evol’ucien aigua sadoi dai tuhanziigi kerdoi tiä Suomes jiäkavven jälles. Yhtelläh sih kaččomattah valgies must’ois ei tulluh ylellisty luaduu. Valgei must’oi on kummalline dielo.

Tämä vikse on toistunuh evol’ucien aigua sadoi dai tuhanziigi kerdoi tiä Suomes jiäkavven jälles.

Karri Jutila

Ruvennetto työndämäh luonnonvardoičuspiirile tieduo valgieh must’oih näh, mustakkua mainita aigu, paikku, kundu, kylä libo koordinuatat sego kohtan kazvillisluadu, valgien must’oin kazvuston suurus da muarjoin miäry. Hyvä on mainita sežo, oligo sit kohtas enämbi valgiedu vai mustua must’oidu.

– Suaduloin tiedoloin perustehel tiijustetah valgien must’oin ylelližyös da kazvandukohtis, juohattau Karri Jutila. Parahis kerdomuksis must’oih näh da reseptois sego valgien must’oin kazvandukohtien tiedolois voibi suaja luonnontiemastu lahjua.

Luve sežo

Harvinainen valkoinen mustikka on varvikoiden mystinen herkku