yle.fi-etusivu

Päččilöin lämmittäjät jatketah vahnah varattavah tabah – kai kuačkuh juovundassah

Pohjas-Karjalan pellastuslaitoksen mugah päččilöi tässähgi vie lämmitetäh uskomuksih yhtyjäh vahnah da varattavah tabah.

Yle Uudizet karjalakse
Puut palavat tulisijassa.
Risto Koskinen / Yle

Pohjas-Karjalan pellastuslaitos on huolevunnuh sit, gu talolois on kuačkuu. Enzihoidajat ollah puaksuh puututtu moizih taloloih, kudamis rahvas ollah oldu juovuttu kuačkuh.

– Ozakse suurdu ozattomuttu vie ei ole roinnuh, ga pahua kuačkuh juovundua erähil ristikanzoil jo ollah nähty, sanelou Pohjas-Karjalan pellastuslaitoksen valmehuspiälikkö Markus Viitaniemi.

Pohjas-Karjalas kuačkuu talolois aiven miärätäh yhtel aigua enzihoidoruavon da palotarkastuksien kel.

Truba salvatah ylen aijoi

Pellastuslaitoksen mugah kuačkuu roih taloih päčin viärän lämmitändän täh. Viäräh päččii lämmitetäh vahnat dai nuoret rahvas.

– Vahnembat da buitegu maltajat päččilöin lämmittäjät tässähgi vie uskotah, gu truba pidäy salvata jo sit, konzu päččih roih sinisty tuldu libo kydijiä hiildy. Yhtelläh se ei ole oigieh, tovendau Markus Viitaniemi.

Viitaniemen mugah uskomus on lujennuh, da kai kuačkus juovuksis olijat ei nähtä nimidä varavuo sit. Yhtelläh puaksuh pellastuslaitoksen miärävykset nähtyy maltajatgi päččilöin lämmittäjät havačutah da kummastellahes kuačkun miäriä omas talois.

Nuorembat päččilöin lämmittäjät voijah hairahtuakseh tiedämättömytty. Viitaniemen mugah päččilöin lämmitändäh opastujat kuunnellah nevvoloi da ruatah niilöin mugah parem, migu vahnembat päččilöin lämmittäjät.

Häkävaroitin kaupan hyllyssä.
Pellastuslaitos nevvou ottua käyttöh kuačkuvaraittimet.Tommi Parkkinen / Yle

Huolelližus tärgevin, kuačkuvaraitin abuh

Pohjas-Karjalan pellastuslaitos juohattau, gu paras taba vältiä kuačkuh juovundua on salvata truba vaste sit, konzu kai hiilet ollah jo mustat. Ližäabuniekannu voibi olla kuačkuvaraitin.

– Kuačkuvaraitin on hyvä abuniekku, ollou se azetettu oigieh da ruadanou se putilleh. Yhtelläh ylen tärgei on lämmittiä päččii oigieh da salvata truba vaste sit, konzu kai hiilet ollah jo mustat. Sen ližäkse žestis pidäy olla leikattu loukko, kudaman kauti kuačku lähtöy iäres, ollou truba salvattu liijan aijoi, tovendau Markus Viitaniemi.

Ylen tärgei on lämmittiä päččii oigieh da salvata truba vaste sit, konzu kai hiilet ollah jo mustat.

Markus Viitaniemi

Kuačku on väritöi, duuhutoi da mavutoi guazu, kudamua et tunnusta ilmai kuačkuvaraitindu. Juovundan merkilöih kuulutah piänkivistys da pahoivoindu. Pahah kuačkuh juovundan aigua voibi olla jygei hengittiä, kuaduo kielimielettäh libo kai kuolta.

Pellastusopiston vuvvennu 2011 luajitun tutkimuksen mugah joga vuottu Suomes kuolou kuačkuh läs 100 hengie tulipalon aigua da kai 20 muuh kuačkuh juovundah.

Luve sežo

Uuninlämmittäjillä vaarallisia vanhoja tapoja – jopa häkämyrkytyksen oireita vähätellään