yle.fi-etusivu

Päivänlaskupuolespäi tulou putin tuhu – Meteoroulogu: pohjazeh kai 20 santimetrii lundu

Tossargen enämbi lundu panou päivännouzupuoles, nellänpiän pohjazes.

Yle Uudizet karjalakse
Auto jolla takavalot ei pala.
Derrick Frilund / Yle

Tulieloin päivien aigua maksau mustua, gu on uskaldettu lumenpanuo da kovua tuuldu. Tänäpäi tossargen muan suvi- da keskičuras lundu panou kogo päivän.

Ilmutiijon laitos (siirryt toiseen palveluun) varaittau tossargen pahas ajodorogas muan suvi- da keskičuris. Liikendehvirraston mugah huondeksen liikendeh meni vie siäh kaččomattah ilmai suurii ozattomuksii.

Ylen meteoroulogan Joonas Koskelan mugah tossargen enämbi lundu panou päivännouzupuoles, kus sidä päivän aigua kerdyy kai 5–10 santimetrii.

Sen sijah pohjazes tossargen on poudu.

Kolmanpiän lumenpano vähenöy da siä enimite on povvakas. Tossargen da kolmanpiän muan suvi- da keskičuras lämbötilat ollah nol’an kohtal libo toinah roih ylen pieni pakkaine. Lapis siä on ihan toine: kolmanpiän yöl pakkastu voibi roita alovehil nenga 15–20 astehtu.

Päiväl lugemat pyzytäh läs endizinny, sanou Koskela.

Tuuli yldyy kolmanpiän

Tuuli yldyy kolmanpiän ehtäl da Suomen yliči pyhkäldäh päivänlaskupuolespäi algajen luja lumenpanoaloveh. Tuuli voibi lujeta nellänpiän merialovehil kai bauhussahgi.

Nellänpiän lundu panou vikse enimite pohjazes, kus ennustehien mugah sidä voibi tulla kai 20 santimetrii. Ezimerkikse nygöi Kittiläs lundu on jo 58 santimetrii. Ilmutiijon laitos varaittau pahas ajodorogas muan suures vuitis sežo nellänpiän.

Koskelan mugah vähimyölleh suvizes Suomes lumi voibi suluagi, sendäh gu nedälinloppussah siä lauhtuu.

Luve sežo

Lännestä saapuu kunnon myräkkä – Meteorologi: pohjoiseen jopa 20 senttiä lunta