Sápmi |

11 jagi dassái jávkan Antti Hanhivaara ohcet maŋimuš geardde Áŋŋelis

Davvin leat imaštallan jo guhká, gosa avvillaš Antti Hanhivaara lea jávkan. Ášši leamašan lossat oapmahaččaide ja dán vahkkoloahpa maŋŋá sii eai áiggo šat ohcat.

ElinaTuiskala_KaisaLehtinen.jpg
Hanhivaara eadnái (gur.) ja oabbái (olg.) dat 11 jagi leat leamašan lossadat. Govva: Linda Tammela / Yle

Avvillaš Antti Hanhivaara jávkamis šaddá golggotmánus 11 jagi.

Hanhivaara jávkkai golggotmánu 14. beaivve jagis 2006. Son lei 21-jahkásaš. Dalle 11 jagi dassái, lávvardat iđđes diibmu gávccis, su oidne maŋimuš geardde vázzimin Áŋŋel gilis máttaviestara guvlui. Dan maŋŋá son ii leat dihtton.

Antti Hanhivaara oapmahaččat ohcet vel oktii dán vahkkoloahpa Áŋŋelis. Su leat ohcan geasi áigge maiddái Gáregasnjárggas.

Hanhivaara oabbá Elina Tuiskala sávvá olbmuid searvat veahkkin ohcamiidda. Ohcamiin ii leat boles mielde, muhto báikki alde lea olmmoš, geas lea ohcanbeana.

– Áibba bures leat ožžon olbmuid mielde, bearjadaga bohtet vuosttas ohccit báikki ala ja lávvardaga bohtet vel lasi, muitala Tuiskala.

Bearaš vuordá 30 olbmo searvat ohcamiidda. Sii fállet eaktodáhtolaš ohcciide niestti ja juhkamuša. Eaktodáhtolaččat sáhttet almmuhit iežaset Elina Tuiskalai dahje Kaisa Lehtinenii.

"Sávvamis oččošeimmet ášši lohppii"

Oabbái lea leamaš lossat go mihkkige ii leat gávdnon 11 jahkái. Elina Tuiskala sávvá, ahte sii gávnnašedje su vielja Antti Hanhivaara dahje su bázahusaid, vai gearggašedje dáinna áššiin 11 jagi maŋŋá.

– Lean smiehttan buot vejolaš molssaeavttuid, muhto nu guhká go Antti ii gávdno, de ii sáhte diehtit mii sutnje lea dáhpáhuvvan.

Geassit sii ohce Antti Hanhivaara Gáregasnjárggas. Dalle čilge goittotge dan veardde ođđa áššit, ahte su mearridedje ohcat vel maŋimuš geardde Áŋŋelis.

– Oalle olu čielggai su maŋimuš eahkedis, maid son lea dahkan ja geaiguin son lea deaivvadan, ja eará dakkár áššit, maid mii oapmahaččat eat leat diehtán, muitala Elina Tuiskala.

Antti Hanhivaara
Antti Hanhivaara jávkamis lea juo 11 jagi. Govva: Elina Tuiskala
Bearaš lea ožžon maiddái muhtin cavgilemiid, ahte Hanhivaara sáhtášii leat vejolaččat mannan Norgga beallái. Áŋŋela gilli lea Norgga rája alde ja Anárjohka luoitá Deanu bokte Jiekŋamerrii.

Elina Tuiskala ii goittotge jáhke, ahte Hanhivaara livččii ieš dáhtul jávkan.

– Iihan dan dieđe sihkkarit go dohko lea oalle álki beassat, muhto in dieđe lešgo son mannan áibbas eaktodáhtolaččat dohko dahje nu, ahte ii livčče midjiide almmuhan maidege ná guhkes áigái, jus son livčče ieš dáhtul jávkan.

Muitoboddu golggotmánus

Dál Antti Hanhivaara ohcet maŋimuš geardde, ovdal su dieđihit jápmin. Bearaš ordne muitobottu golggotmánus, jus mihkkege ii maŋimuš ohcanreaissus gávdno, muitala Hanhivaara oabbá Elina Tuiskala.

– Sávvamis mii oččošeimmet dan ášši dál lohppii.

Jápmima julggaštanproseassa lea juo álggahuvvon. Dan maŋŋá sii leat geargan áššiin. 

– Iihan dan dieđus goassege vajáldahte, dat lea leamašan nu lossat, loahpaha Tuiskala.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä