Sápmi |

70% sámemánáin sámeguovllu olggobealde – Ain váttisvuođat fidnet giellaoahpahusa uhccit sámegielaide

Anárašgiela oahpahus ii leat lihkostuvvan dán lohkanbajis ovdamearkka dihtii Tamperes. Áššiin leat goittotge bargamin, muitalit Tampere gávpogis.

Nuortalašgiela oahpahus
Govva: Yle Sápmi

Tampere-guovllus anárašgiela oahpahus ii leat ordnasuvvan dán jagi. Lohkanbadji lea skuvllaiguin juo beallemuttus, muhto oahpahusa ii leat ožžon áigái, vaikko dáhttu livčče leamaš.

Tampere gávpoga bajásgeassin- ja oahpahushoavda Tuija Viitasaari lohká, ahte sii leat lihkosmuvvan ordnet davvisámegiela oahpahusa.

– Davvisámegielat joavkkus leat oktiibuot čieža oahppi ovdaskuvllas gitta čihččet luohká rádjái, muitala Tuija Viitasaari Yle Sápmái.  

Anáraš- ja nuortalašgielat oahpahusa ordnen hástalussan

Tampere gávpoga bajásgeasin- ja oahpahushoavda Tuija Viitasaari dadjá, ahte dán čavčča Tampere gávpogis eai bastán fállat ohppiide anáraš- ja nuortalašgiela oahpahusa. Anárašgiela oahpahusas leamaš okta oahppi mannan lohkanjagi. Maiddái dán jagi anárašgiela oahpahus guoská ovtta oahppi.

– Ovdal oahpahus ordnejuvvui Avvila skuvlla bokte gáiddusin. Dán čavčča oahpahus ii šaddange Anár gieldda bokte ja leat ohcamin ođđa čovdosa anárašgiela oahpahusa ektui. Ášši lea barggu vuolde, čilge Viitasaari.  

Tamperes leamaš maiddái nuortalašgiela oasil váttisvuođat ordnet oahpahusa. Boahtte jagi álggus oahpahus goittotge álgá, dadjá Viitasaari. 

– Nuortalašgiela oahpahusa leat ordnemin jagi 2018 álggus gáiddusin. Oahpahusa fállá Sámi oahpahusguovddáš.

Nuortalašgiela oahpahusas leat mielde Tampere gávpoga ovtta oahppi lassin oahppit earáge guovlluin, dadjá Tampere gávpoga vuođđooahpahusa plánejeaddji Katja Simonen.        

Olbmot leamaš fuolas oahpahusas

Facebook-ságastallamiin boahtá ovdan, ahte skuvlla beales leat muhtun sajiin geahččalan gávdnát čovdosa, muhto resurssat eai oro leamen. Maiddái dárkilut diehtu das, mo oahpahusa sáhtášii ordnet, váilu.

Sámegieloahpahusa birra leat hállán guhká. Diibmá Guovddašbellodaga riikkabeaiáirras Katri Kulmuni muittuhii das, ahte oahpahus ii livčče nu beare váttis bidjat johtui.

Ovdamearkka dihtii Ohcejoga gielddas ja Sámi oahpahusguovddážis lea leamašan miella ordnet gáiddusoahpahusa riikaviidosaččat nu, ahte Ohcejoga gielda dan koordinerešii ja ordnešii Ohcejogas ja dasto Sámi oahpahusguovddáš vástidivčče gáiddusoahpahusa doarjjabálvalusain.

Kulmuni mielde diekkár oahpahusa sáhtášii ollašuhttit ovttas Sámedikkiin ja Lappi guovlohálddahusain. Árvaluvvon golut jagis livččet 220 000 euro, nuba Kulmuni oaivvildage, ahte gáiddusoahpahusa ordnen ii gáibit dađi stuorat investeremiid.

Rievdadus boađi boađi?

Sámediggeáirras Jan Saijets muitala Facebook-ságastallamis, ahte moadde vahku dassá Sámediggi ovttas oahpahus- ja kulturministeriijain soabaiga gáiddusoahpahusa álggáheamis prošeaktahámis.

– Dálá dieđu mielde Ohcejogas ordnejuvvo gáiddusoahpahus sámeguovllu olggobeallái ja Sámi oahpahusguovddáš ordne dasa vejolašvuođaid. Mii eat leat lávdegottis gieđahallan ášši, muhto boahtte vahkus gal, son muitala.

Son goit deattuha, ahte dát ii goit rievdat laga, mii bággešii gielddaid ordnet oahpahusa. Ášši goit sihkkarit álkidahttá ordnema. Maiddái Saijets oaivvilda, ahte dakkár hámis oahpahus livčče oalle hálbi.

SOG ordne gáidduskurssaid - Doppe ii goit vuođđooahpahusvuoigatvuohta

Mánáiguin sámeguovllu olggobealde lea hui earálágan vejolašvuođat sámegielaid stuđeremii, go buot lea gitta gielddas.

Váhnemat leat muitalan iežaset vásáhusain Facebookas. Okta ovdamearka lea dat, ahte Sámi oahpahusguovddážis oažžu mánáide gáiddusoahpahusa ruoktot. Mánáide goit ii boađe makkárge nummiriid skuvladuođastussii, danin go Sámi oahpahusguovddážis ii leat vuođđooahpahusvuoigatvuohta. Nuba mánáide giellaohpahus soaitá leat vehá dego ástoáiggedoaibma.

Divvojuvvon 27.11. dii 14:59. Ođas dárkkalmahttojuvvon nu, ahte sámegiela oahpahusa ordnemis leamaš váttisvuođat anárašgiela ektui. Ođđasiid lasihuvvon maiddái Tampere gávpoga Tuija Viitasaari kommeanta ja dieđut Tampere gávpoga sámegiela oahpahusas.

Divvojuvvon 27.11. dii  15:53. Divvojuvvon Viitasaari kommeanttas Roavvenjárga skuvla Avvila skuvlan ja lasihuvvon Katja Simonen kommeanta.

Varrasamosat: Sápmi

Váldoođđasat

Varrasamosat

Muualla Yle.fi:ssä