Saame |

Aanaar Konišjäävri riddoost kullojii tâi uáinojii 16 eres loddešlaajâd luudij bongampeeivi – keejâ video

Aanaar Konišjäävri riddoost ässee Marke Laaksonen uásálistij Šiljoi taistâlem -piäiván, mut ij peessâm 500 pyeremuu juávkun.

Video: Marke Laaksonen
Marke Laaksonen bongaa luudijd.

Lávurduv 9.5. lâi ubâ Suomâst loddešlaajâi bongampeivi, Šiljoi taistâlem. Ovdil návt kiđđuv lii lamaš Tornij taistâlem, mut korona tet taat-uv muttui tääl nuuvt, et ulmuuh šiljoinis reknistii luudijd.

Aanaar Konišjäävri riddoost ässee Marke Laaksonen ooinij tâi kuulâi ohtsis 16 jieškote-uv loddešlaajâd. Sun aalgij perustui luudij kuvviimist suulân 15 ihheed talle. Tääl sun tobdá paijeel čyeti lodded. Kamera iššeed ennuv taan hommáást, ko váldá kove já talle maŋeláá puáhtá tutkâđ, mii luudijd tot lii.

– Kuvvim addel háástu, et puáhtá ain pyerebeht já pyerebeht kuvviđ taid luudijd já uáiniđ imâšlijd aašijd. Taat lii lam munjin tot vaigutteijee, muštâl Laaksonen.

Láá lodeh moid lii vaigâd iäruttiđ já motomingis lii hitruus nommâ

Motomijd luudijd lii älkkee tubdâđ, mut láá meid vaigâdis šlaajah. Marken taha vädisvuođâ uáiniđ já iäruttiđ vielgisurbijáá táválii urbijáást, ko toh lává nuuvt siämmáálágáneh. Marke mielâlodde väljejuvvoo noomâ mield.

– Muu mielâst hurečuhčá lii hirmâd šiev loddenommâ, ko tot lii váhá hurráá, povvust Laaksonen.

Vuáittu moonâi máádás – Aanaar kuávlu pyeremus bongai 42 šlaajâd

Šiljoi taistâlem -peeivi vuáittu moonâi máádás Virolaahtin, kost Seppo Vuolanto bongai 98 eres lodded. Aanaar kuávlu pyeremus lâi Taneli Halonen Avelist 42 šlaajáin. Marke Laaksonen ij peessâm 500 pyeremuu juávkun toi 16 eres loddešlaajáin, maid bongai šiljostis.

Tääbbin uáiná maht “Šiljoi taistâlem” -peivi Suomâst moonâi ja kiän šiljoost lijjii enâmustáá lodeh.

Kuldâl Marke Laaksonen sahhiittâllâm täst. Audio: Anja Kaarret / Yle

Tuoreimmat: Saame

Váldoođđasat

Varrasamosat

Muualla Yle.fi:ssä