Säämi |

Aanaar kundáást lijjii kyehti molsâiävtu jieŋâkuávdážân, Päärtih já Kuátiluohtâ – Kuátiluohtâ vuoitij

Ääšist jienâstii já Päärtih táppái jienâigin 5-4.

Video: Kuátiluovtâ , päikki kuus jieŋâkuávdáš puátá .
Video
Kuátiluovtâ já Njihenjaargâ sááđhuh.

Aanaar kundáhaldâttâs meridij taan oho čuákkimistiš, et jieŋâkuávdáš puátá Kuátiluohtân. Jienâstmist Päärtih táppái jienâigin 5-4.

Kundáhaldâttâs saavâjođetteijee Jari Huotari iävtuttâs, et jieŋâkuávdáá rähtih Kuátiluohtân, peeleest jienâstii Kari Akujärvi, Janne Hannola, Jaana Seipiharju já Anne Tuovila.

Päärtih peeleest jienâstii Hannu Alenius, Miia Kärnä, Maire Puikko já Timo Väisänen.

Jieŋâkuávdáš Kuátiluohtân

Kundáhaldâttâs saavâjođetteijee Jari Huotari piäluštij Kuátiluovtâ jieŋâkuávdáá toin, et sii tollii taan čielgâ äššin et tot tohon puátá. Ruttâ ij rijttááččii eres sajan.

– Ruttâ täđe várás lii värrejum 56 000 eurod mii rijttáá virgeulmui rekinistmij mield Kuátiluohtân, kost lii omt. kundá šleđgâ valmâšin, já sátku, muštâl Huotari.

Aanaar kundáhaldâttâs saavâjođoeijee Jari Huotari
Kundáhaldâttâs saavâjođetteijee Jari Huotari Govva: Anja Kaarret / Yle

Päärttihliih lijjii muštâlâm kundá ulmuid aagâid mondiet jieŋâmaaššin sovâččij Njihenjaargân pyerebeht ko Kuátiluohtân já lijjii meid noomâid čuággám Čevetjäävri rääjist. Meid Čevetjäävri kuálásteijeeh láá viežžâm jieŋâid Päärtihist, talle ko tobbeen lijjii val jieŋâpääihih, kost jieŋâid uážui. Mihheen ij ávttám. Kundáhaldâttâs saavâjođetteijee Jari Huotari kal rammui Päärtihlijd iäljárin ko nuuvt viššaleh lijjii noomâid čuággiđ.

– Muu mielâst taat lii fiijnâ et Päärtihliih lijjii nuuvt aktiivliih taan ääšist, taat meerhâš tom et sij láá perustum jieijâs siijdâ aašijn já täst puáhtá leđe val motomin iše, arvâl Huotari.

– Miarádáš lii tohhum já muu mielâst täst ij pyevti vaidâliđ já hommá lii vuálgám jo joton, nuuvt et Kuátiluohtân lii jo čäcikáivu-uv rahtum, muštâlij Huotari.

Pärttihist lamaš ovdil-uv jieŋâmaašin

Pärttihist lii lam motomin taggaar jieŋâi rähtim maašin, mut tot čuovkkânij. Ton maŋâ jieŋâid puohtii Päärtihkuávlu kuulmâ jieŋâkaasân, moh láá vala-uv Kuátiluovtâst, Njihenjaargâst já Njižžjäävri riddoost.

Taat palvâlus nuuvâi oovdeb keesi, ko pyehtee paasij iäláttâhân. Moonnâm keesi Päärtih já Čevetjävri ässeeh viežžii jieŋâid Anarist.

Kuátiluovtâ , päikki kuus jieŋâkuávdáš puátá .
Kuátiluovtâ , päikki kuus jieŋâkuávdáš puátá .

Tääl iä päärtihllijd kuldâlâm

Päärtih sijdâtoimâkode uáiviolmooš já kávpálâškuálásteijee, Pekka Kokkonen lii aaibâs jierestum, ko jieŋâkuávdáá rähtih Kuátiluohtân.

Kuálásteijee Pekka Kokkonen.
Kuálásteijee Pekka Kokkonen. Govva: Anja Kaarret / Yle

– Kal tääl osko lii moonnâm toid kiäh miärádâsâid taheh. Lep irâttâm vaikuttiđ maaŋgânáál já puáđus lii tääl taat, te lii vaigâd oskođ, imâštâl Kokkonen.

– Iimâš lii meid tot, et maht kundá ráhtá jieŋâsaje tohon, kost ij lah mihheen. Kuáđá ellee siijdâ palvâlusâittáá, juátká Kokkonen, ij-uv kundá kolgâččii tohon faallâđ palvâlusâid, kost toid tarbâšeh?

Čevetjävrilijih-uv viežžih tääl jieŋâid Anarist

Áámmátkuálásteijee Juha Feodoroff Čevetjäävrist ij lijkkuu tost, et jieŋâkuávdáš puátá Kuátiluohtân. Ovdil sun viežâi Njižžjävri jieŋâkuávdáást jieŋâid já moonnâm keesi Anarist kuovttijn puolâščuhhijn. Sun eelij keččâmin taam Kuátiluovdâ pääihi.

Juha Feudoroff áámmátkuálásteijee Čevetjäävrist.
Juha Feudoroff áámmátkuálásteijee Čevetjäävrist. Govva: Anja Kaarret

– Kiäinu lii hyeni, kukken meecist já iähán tobbeen aasâ ulmuuhgin, iätá Feudoroff.

Feodoroffist puátá jieŋâ viežžâm mätki paijeel 240 km Anarân oovdâš-maŋas. Taat kuittâg tuáimá tom tááhust, et meid kuolijd kalga tuálvui markkân pááikán.

Kuátiluovtâst láá ennuv astoäigi kámpáh

Pasi Aikio , Kuátiluovtâ astoääigi ässee.
Pasi Aikio , Kuátiluovtâ astoääigi ässee. Govva: Anja Kaarret / Yle

Kuátiluovtâ uđđâ astoäigi ässee Pasi Aikio lii tääl huksiimin olssis kámpá Aanaarjäävri riidon Kuátiluohtân.

Sun ij tääl oostâ nuuvt ennuv kuálástiđ, mut amahân sun-uv viäžžá tiest alda jieŋâid jos taarbâš. Sun kal meid uážžu Anarist jieŋáid, ko suu päikki lii tobbeen.

– Munjin aaibâs siämmáá, muu peeleest tom puáhtá huksiđ veik Pärttihán, arvâl Aikio.

Jietna: Kuátiluovtâ , päikki kuus jieŋâkuávdáš puátá .
Jietna
Jieŋâkuávdáš puátá Kuátiluohtân.

Varrasamosat: Säämi

Váldoođđasat

Bivnnuhamosat

Varrasamosat

Muualla Yle.fi:ssä