Sápmi |

Aanaarjäävrist kavnum vuot čuovjistiäppu – IJP-kuávdáá biologi: "Kale taat lii aaibâs táválâš tile, jis váldá vuotân taid lieggâ šooŋâid"

Nanguvuonâst já Aanaarjäävri koskâoosijn láá kavnâm čuovjistiäpu syeinimáánust.

Sinilevää Paadarjärvessä
Biologi Jukka Ylikörkkö muštâl, ete lii máhđulâš et uáli jo tavveen-uv šadda čuovjistiäpu, jis kuhháá láá lieggâ šooŋah. Govva: Jorma Hevonkoski

Biologi Jukka Ylikörkkö Laapi IJP-kuávdáást muštâl, ete Säämist láá puáttám kyehti almottâs IJP-kuávdážân čuovjistiäpust. Nanguvuonâst já Aanaarjäävri koskâoosijn láá kavnâm čuovjistiäpu tääl syeinimáánust.

– Kale taat lii aaibâs táválâš tile, jis váldá vuotân taid lieggâ šooŋâid.

Sáttá leđe, et čuovjistiäppu kávnoo meid eres kuávluin Säämist, mutâ tärkkilis tiäđu lii vaigâd finniđ.

– Tuárispel kuávluin lii vaigâd tiettiđ kávnoo-uv, ko tot lii kiddâ tast, et sáttoo-uv mottoom olmooš uáiniđ tom já muštâl-uv tast mijjân.

– Lii máhđulâš, et uáli jo tavveen-uv lii čuovjistiäpu, jis kuhháá láá lieggâ šooŋah.

"Čuovjistiäppu šadda táválávt talle ko čääsi liegâsvuotâ lii paijeel 20 cekkid"

Biologi Jukka Ylikörkkö mielâst lii máhđulâš, ete čuovjistiäppumereh lasaneh, jis Sáámán puátih lieggâ šooŋah, mutâ táválávt loppâkeesist čuovjistiäppu ij innig kavnuu.

– Čuovjistiäppu šadda táválávt talle ko čääsi liegâsvuotâ lii paijeel 20 cekkid. Nube tááhust čuovjistiäppu kávnoo eenâb meid ravâdâhvaljaas čääsist.

Ovtâskâs ulmuuh čuávvojeh čuovjistiäpputile

Väldikodálâš čuovjistiäppučuávumist láá fáárust ovtâskâs ulmuuh, kiäh čuávvojeh čuovjistiäpputile.

Jukka Ylikörkkö muštâl, et Tave-Säämist tágáreh ulmuuh iä lah. Lokka lii tavemus saje, kost lii olmooš kote čuávu čuovjistiäpputile. Tárbu tággáár ulmuid kuittâg lii.

– Tiäđust-uv väldip vuástá uđđâ čuovjistiäppučuávvoid. Iä lah eres vatâmušah, pic et kolgâččij jyehi ohhoost čuávvuđ já tärhistiđ čuovjistiäpputile. Tile kolgâččij čuávvuđ kesimáánust čohčâmáánu räi.

Varrasamosat: Sápmi

Váldoođđasat

Varrasamosat

Muualla Yle.fi:ssä