Säämi |

Aanaarohoh älgih onne – Ohjelmist tánssám, muusik já lihâdemtábáhtusah

Aanaarohoh láá taan ive 11. tove. Tábáhtusâin lii máhđulâš ovdâmerkkân kavnâđ rähisvuođâ, kuldâliđ muusik já lihâdiđ.

Aanaarohoh
Taan ive Aanaarohhoin láá suullân 130 tábáhtussâd. Govva: Inariviikot / Jan-Erik Paadar

Kulttuurčällee Mirja Karjalainen muštâl, ete taat lii 11. tove ko uárnejeh Aanaarohoid. Ärbivuáváliih tábáhtusah láá siäilum meid taan ive, mutâ láá meid uđđâ tábáhtusah.

– Mist láá hirmâd ennuv tábáhtusah: jooga, lihâdemtábáhtusah já eromâšávt taan ive láá nuuvt pyereest masa puoh kyláin tábáhtusah. Mađhâšemirâtteijeeh láá taan ive eromâšávt movtáskâm fáárun, muštâl Karjalainen.

Aanaarohoi ohjelm puáhtá luuhâđ kuuđâ kielân. Suomâkielân, eŋgâlâskielân, ruošâkielân, anarâškielân, tavesämikielân já nuorttâlâškielân.

– Taat lii kuálmád ihe ko mist láá sämikielah fáárust ohjelmist já mij keččâlep ain almostittiđ sämikielân. Mun jieš halijdiččim val eenâb tiäđuid tohon sämikielân, muštâl kulttuurčällee.

Kulttuurčällee ana tehálâžžân, ete kielâ lasseen meid kulttuur uáinoo.

Inarin kulttuurisihteeri Mirja Karjalainen
Kulttuurčällee Mirja Karjalainen muštâl, ete jyehi ihe sämikulttuur uáinoo mahtnii Aanaarohhoin. Govva: Jarmo Siivikko / Yle

– Keččâlep ain finniđ fáárun sämikulttuur Aanaarohhoid, tijmá lâi suotâs ko mist lâi taat Gájanas-juávkku fáárust. Talle tääl Kuulast láá sämimácuheh uáinimnáál, muštâl Karjalainen.

Aanaarohhoin láá suullân 130 tábáhtussâd

Ovdâmerkkân Kaamâsist uárnejeh nube tove Kaamâs rähisvuotâ –tábáhtus (su. Kaamanen LOVE). Tobbeen lii uáli maaŋgâpiälálâš ohjelm.

– Taat ubâ hommá lii nuuvtá. Tobbeen lii muusik, tiivtah, karaoke, čuovâkovekišto, jyelgipáálu, muštâl Kaamasen kyläyhdistys saavâjođetteijee Anna Askala.

– Taat lii tehálâš hommá , ete tun puávtáh puáttiđ já tuš keččâđ já meid jieš maidnii porgâđ. Kaamâsist lii ain olmâ meeinig, muštâl Askala.

Askala lâi meid moonnâm ihe orniistâlmin tábáhtus.

– Páiháliih, ete turisteh fáárust, ete ennuv ulmuuh lijjii kale já moonnâm keesi kyehti ulmuu kaavnâi rähisvuođâ eidu taan tábáhtusâst, sun muštâl.

Anna Askala
Anna Askala lii Kaamasen Kyläyhdistys rs. saavâjođetteijee. Govva: Sáárá Seipiharju / Yle

Kaija Anttonen lii Kaamâslâš já áigu uásálistiđ Kaamâs rähisvuotâ -tábáhtussân. Sun áigu moonnâđ spellâđ jyelgipáálu, mutâ ij taarbâš hárjuttâs ko lii nuorrân spellâm mimmiliigast. Sun lii moovtâ ko Kaamâsist-uv tábáhtuvá Aanaarohoi ääigi.

– Tot lii hirmâd suotâs ko Kaamâsist uárnejeh tággáár tábáhtus, Anttonen illood.

Jyelgipáálu lasseen sun áigu meid luuhâđ tiivtâid.

– Mun lam áigumin muáddi tiivtâ luuhâđ moh muštâleh rähisvuođâst. Mun ááigum luuhâđ Rauni Magga-Lukkari tiivtâid, sun muštâl.

Taan ive Aanaarohhoin láá suullân 130 tábáhtussâd.

– Tääl lii tuše valjiđ kalenderist tábáhtus mii kiäsut tuu, kulttuurčällee Mirja Karjalainen avžut.

Aanaarohoi ohjelm puávtáh luuhâđ täst.

Varrasamosat: Säämi

Váldoođđasat

Varrasamosat

Muualla Yle.fi:ssä