Sápmi |

Áŋŋela guovllus Anárjohkii heavvanan olmmoš lea gávdnon

Lihkohisvuohta dáhpáhuvai, go guokte albmá leigga bidjamin fatnasa johkii, muitala NRK. Heavvanan almmái lei 60-jahkásaš Norgga riikkavuloš.

Poliisiauto
Norgga siviilasuodjalus, Rukses ruossa ja Norgga gádjunbeatnagat oassálastet ohcanbargui ovttas bolesiiguin. Govva: Timo Nykyri / Yle

Boles ozai mannan ija rájes Áŋŋela guovllus Anárjohkii jávkan albmá. Finnmárkku boles dieđihii diibmu 11.29 Suoma áigge Twitteris, ahte 60-jahkásaš almmái lea gávdnon heavvanan moaddelot mehtera eret dan báikkis, gos son jávkkai.

Gádjunlágádus fidnii ihkku beal guovtti áigge dieđu olbmos, guhte lei jávkan go fanas lei gopmánan Anárjoga alde Áŋŋela Bortageavgŋás. Gádjunlágádus ii gávdnan olbmo vel ihkku.

Lihkohisvuohta dáhpáhuvai, go almmáiguovttos leigga bidjamin fatnasa johkii, muitala NKR Sápmi. Fanas gopmánii ja nubbi albmáin gárttai johkii. Nubbi albmáin beasai gáddái ja dáhtui veahki. Johkii gártán almmái nagodii doallat fatnasis gitta, muhto lei jávkan dan botta go nubbi lei ohcamin veahki.

NRK dieđuid mielde heavvanan olmmoš lea Norgga riikavuloš.

Norgga siviilasuodjalus, Rukses ruossa ja Norgga gádjunbeatnagat oassálaste ohcanbargui ovttas bolesiiguin, muitala Finnmárkku politiijaguovddáža operašuvdna jođiheaddji Torfinn Halvari.

– Váldogádjunguovddáš sáddii Sea- King helikoptera báikái, mii lea girdán báikki badjel, lohká Halvari.

Varrasamosat: Sápmi

Váldoođđasat

Varrasamosat

Muualla Yle.fi:ssä