Sápmi |

AHR attii njeallje jahkegirjemearrádusa 93 dohkkehuvvon olbmo birra

Alimus hálddahusriekti dohkkehii gaskavahku 93 ođđa olbmo sápmelažžan Sámedikki dáhtu vuostá. Váidaleaddjit ledje 182. AHR attii njeallje jahkegirjemearrádusa áššis.

AHR attii njeallje jahkegirjemearrádusa sápmelažžan dohkkeheamis jagis 2015.

Vuosttas jahkegirjemearrádus vuođđuduvvá ollislaš árvvoštallamii

AHR vuosttas jahkegirkemearrádusa detáljain boahtá ovdan, ahte okta sápmelažžan dohkkehuvvon olbmuin lea dutki Erika Sarivaara.

Su galgá atnit sápmelažžan AHR mielde danin, go son nállášuvvá jagis 1739 eanangirjái merkejuvvon lappalaččas, daningo son lei jáhkehahtti láhkai čájehan iežas sámi sohkaduogáža ja nanu oamastuvvama sihke priváhta- ja ámmáteallimisttis sámegillii ja sámi kultuvrii.

Sarivaara galgá AHR mielde ollislaččat árvvoštaladettiin atnit sápmelažžan.

Nuppi jahkegirjemearrádus: Eadni lea merkejuvvon válgalogahallamii

AHR nuppi jahkegirjemearrádusas čilgejuvvo mearrádus, mas olbmo galgá merket sápmelažžan, daningo váidaleaddji lei almmuhan, ahte ahte son atná iežas sápmelažžan ja daningo su eatni lei merkejuvvon jietnavuoigadahtton olmmožin válgalogahallamii.

Goalmmát jahkegirjemearrádusge vuođđuduvvá ollislaš árvvoštallamii

Goalmmát jahkegirjemearrádusas AHR čilge mearrádusa, mas lea maid atnojuvvon nu gohčoduvvon ollilaslaš árvvoštallan. Olbmo ii sáhttán merket sámedikki válgalogahallamii dušše fal sápmelašmeroštallama giellakritera dahje lappalaščuoggá vuođul.

– Giella- ja buolvaduvvanáššit sihke váidaleaddji ovdanbuktin čilgehus iežas sápmelaš eallinvugiin ja buohtastuvvamis sápmelašvuhtii váikkuhe goitge ollislaš árvvoštallamis dađi lági mielde, ahte váidaleaddji gehččui deavdit sámediggelága sápmelašmeroštallama, AHR ákkastallá.

Olmmoš lei buktán ovdan, ahte son nállášuvvá jagis 1825 eanangirjái merkejuvvon lappalaččas, čielggadusa das ahte su guktuid vánhemiid máttarvánhemat ledje merkejuvvon Anára sápmelaččaid bearaškartotehkii ja priváhtaolbmo duođaštusa das ahte su eadni lei sárdnon anárašgiela vuosttas giellan.

– Duođaštusa addán olmmoš muitalii, ahte son lei bártnážin mielde bearraža eallimis. Son lei dáid oolbmuid fuolkin sárdnon anárašgiela váidaleaddji áhkuiguin ja ádjáiguin. Ovdamearkan guliid namat ledje daddjon anárašgillii, AHR akkástallá.

Njealját jahkegirjemearrádus: Áhku eadni sártnui sámegiela

Njealját jahkegirjemearrádusas AHR muitala, ahte ohcci galgá atnit sápmelažžan sápmelašmeroštallama giellačuoggá ja goalmmát čuoggá vuođul.

Ohcci máttaráhku – áhku eatni – eatnigiella lei virgeduođaštusa "Lappi"-merkejumi mielde sámegiella. Dán dihte AHR oaidná, ahte ohcci eadni livččii sáhttán merkejuvvot válgalogahallamii. Danin ohccige galgá atnit sápmelažžan.

Alimus hálddahusrievttis mearrádusaid dahke vihtta duopmára, hálddahusráđđeolbmot Matti Pellonpää, Anne E. Niemi, Eila Rother, Eija Siitari ja Mikko Pikkujämsä. Dát namat leat almmuhuvvon 4 jahkegirjemearrádusas.

Varrasamosat: Sápmi

Váldoođđasat

Varrasamosat

Muualla Yle.fi:ssä