Sámepolitihkka |

AHR dohkkehii 93 ođđa olbmo sápmelažžan

Alimus hálddahusriekti dohkkehii gaskavahku 93 ođđa olbmo sápmelažžan Sámedikki dáhtu vuostá. Váidaleaddjit ledje 182.

Korkeimman hallinto-oikeuden talo Helsingin Fabianinkadulla.
Govva: Yle

Alimus hálddahusriekti attii gaskavahku mearrádusaid, mat gusket sápmelažžan ohcaleami.

Alimus hálddahusriekti dohkkehii 93 ođđa olbmo sápmelažžan nappo Sámedikki válgalogahallama lahttun. Alimus hálddahusriekti dohkkehii dáid olbmuid sápmelažžan Sámedikki dáhtu vuostá.

Váidaleaddjit ledje 182. Sihke sámedikki válgalávdegoddi ja stivra ledje hilgon dáid olbmuid ohcamušaid ja njulgengáibádusaid.

AHR attii áššis njeallje jahkegirjemearrádusa.

Besset jienastit

Dohkkehuvvon olbmot besset jienastit dáid sámediggeválggain. Jienastanbeaivi lea sotnabeaivve 4.10.2015.

Jienasteaddjit dáid válggain leat oktiibuot sullii 5 900. Ovddit válggain jienastanproseanta lei sullii 50 proseantta.

Sámedikki válgalávdegoddi dohkkehii giđđat sullii 500 ođđa jienasteaddji ja Alimus hálddahusriekti dál vel lasi.

Alimus hálddahusriekti gulai váidalusaid geažil sámedikki stivrra ja váidaleddjiid ja gieđahalai áššiid spiehkastatjođánis áigedávvaliin.

Reakšuvnnat lasseradiosáddagis

Yle Sámi Radios lea gaskavahku 30.9.15 diibmu 14 lasseradiosátta, mii gieđahallá AHR mearrádusaid.

Mielde leat earet eará Sámedikki ságadoallit Tiina Sanila-Aikio, Heikki Paltto ja Ulla Magga sihke Sámedikki válgalávdegotti ságadoalli Janne Näkkäläjärvi ja Sámedikki ovddeš ságadoalli Klemetti Näkkäläjärvi.

Varrasamosat: Sámepolitihkka

Váldoođđasat

Varrasamosat

Muualla Yle.fi:ssä