Sápmi |

AHR lea gieđahallan sullii 130 váidaga lasi Sámedikki válgalogahallamis – máhcaha goit ovtta dáhpáhusa Sámedikki stivrii

AHR lea dál dahkan mearrádusaid stuorámus oasis váidagiin, mat gusket Sámedikki jagi 2019 válgalogahallama.

Korkeimman hallinto-oikeuden talo Helsingin Fabianinkadulla.
Govva: Yle

Suoma alimus hálddahusriekti lea otne bearjadaga addán mearrádusaid sullii 130 váidagis, mat gusket Sámedikki jagi 2019 válgalogahallama.

Alimus hálddahusriekti ii muital Yle Sápmái mearrádusaid sisdoalus dađi eanet, muhto okta mearrádusain lea almmustahtton AHR neahttasiiddus jahkegirjemearrádussan. Dainna alimus hálddahusriekti gomiha ovtta Sámedikki stivrra mearrádusa leat válddekeahttá olbmo válgalogahallamii. Alimus hálddahusriekti máhcaha ášši stivrii, mii galgá gieđahallat dan ođđasit. Alimus hálddahusriekti oaivvilda, ahte Sámedikki stivrra ákkastallamat dán dáhpáhusa buohta eai deavdde hálddahuslága gáibádusaid.

Sullii 200 olbmo leat váidán alimus hálddahusriektái, go Sámedikki stivra ii dohkkehan sin Sámedikki válgalogahallamii dáid válggaid áigge. AHR attii vuosttas mearrádusaid dáid váidagiin guokte vahku áigi. Maiddái dalle almmustahtton jahkegirjemearrádusas alimus hálddahusriekti gomihii Sámedikki stivrra mearrádusa ja mearridii, ahte váidi merkejuvvo Sámedikki válgalogahallamii jietnavuoigadahtton jienasteaddjin jo dáid, jagi 2019 válggaide.

AHR vuosttas mearrádusaid kritiserejedje sihke Sámediggi ja láhkačeahpit. Maiddái ON olmmošriektekomitea lea moaitán Suoma sápmelaččaid rivttiid rihkkumis dákkár dáhpáhusain. Komitea mielas Suoma alimus hálddahusriekti lea doaibman boastut, go lea dohkkehan Sámedikki válgalogahallamii olbmuid Sámedikki válgalávdegotti ja stivrra dáhtu vuostá.

Dál dahkkon mearrádusain lea mearkkašupmi boahtte válggas

Suoma sámediggeválggat ledje 2.–30.9.2019. Alimus hálddahusriekti ii geargan gieđahallat buot válgalogahallamii váldimis dahkkon váidagiid válggaid áigge.

Alimus hálddahusriekti čállá jahkegirjemearrádusastis, ahte go sámediggelága mielde Sámedikki válgalávdegoddi čohkke válgalogahallama ovddit válggaid válgalogahallama ja álbmotregistara dieđuid mielde, lea váidi merkemis jagi 2019 válgalogahallamii ain "iehčanas mearkkašupmi" boahttevaš válggain.

– Olbmot biddjojit válgalogahallamii AHR mearrádusain. Sii ožžot das dieđu poastta dahje šleađgapoastta bokte, AHR:s čilgejit.

Alimus hálddahusrievttis leat ain gieđahallanláhkai Sámedikki válgalogahallamis dahkkon váidagat. Dat mearrida loahpain váidagiin golggotmánu áigge.

Varrasamosat: Sápmi

Váldoođđasat

Varrasamosat

Muualla Yle.fi:ssä