Sápmi |

AHR mearridii unnidit Palsinoja gollerogganguovllu – ákkastallá mearrádusa árbevirolaš sámi boazodoaluin

Sámediggi váiddii Palsinojai addon mášengollerogganlobis alimus hálddahusriektái suoidnemánus 2019.

ihmisiä kaivupaikkaa katsomassa hiekkamaassa
Alimus hálddahusriekti dagai geahčadeami Palsinojai čakčamánus. Govva: Vesa Toppari / Yle

Alimus hálddahusriekti (AHR) lea unnidan gollerogganguovllu Bátneduoddara guovllus Anáris.

AHR lea ráddjen rogganguovllu nu, ahte gollerogganguovllu ja bálgosiid gaskii báhcá viiddit bálggis bohccuide johtit geasseguohtumii.

Alimus hálddahusriekti ákkastallá mearrádusas árbevirolaš sámi boazodoaluin.

AHR: Palsinojas golleroggan heajuda mearkkašahttiláhkái sámi boazodoalu

Guovlu lea dehálaš guottetbáiki ja geasseorohat Avvila bálgosii. AHR oaivvilda, ahte golleroggandoaimma hárjeheapmi sullii 13 kilomehtera guhkkosaš goivvohaga rokkis váttásmahtášii bohccuid johtima geasseguohtumii.

Golleroggandoaimmaid dihte ovdamearkka dihte geasseorohat bázášii mearkkašahtti osiin geavatkeahttá. Dát fas bijašii deattu bálgosa eará guohtuneatnamiidda ja dat golašedje jođánabbot.

AHR oinnii, ahte golleroggamis ovttas guovllu eará goaivundoaimmaiguin livčče jáhkkimis dakkár váikkuhus boazodollui, ahte dat heajudivčče mearkkašahttiláhkái sámi boazodoalu dán guovllus.

Palsinoja
Palsinoja lea Bátneduoddara guovllus, Anára ja Suoločielggi oarjjabealde. Govva: Ilkka Kemppinen / Yle

AHR finai báikki alde čakčat

Ášši duogáš lea dat, ahte Sámediggi guoddalii Palsinoja mášengolleroggamii addojuvvon lobiin Vaasa hálddahusriektái. Sámediggi ii duhtan Vaasa hálddahusrievtti mearrádussii iige ášši šat doppe ovdánan. Danin Sámediggi váiddii áššis alimus hálddahusriektái suoidnemánus 2019.

AHR dagai geahčadeami báikái čakčamánus. Geahčadeapmi ii lean dikki njálmmálaš gieđahallan, muhto báikki geahčadeapmi geavahuvvui vuođđun ášši loahpalaš gieđahallamis.

Varrasamosat: Sápmi

Váldoođđasat

Varrasamosat

Muualla Yle.fi:ssä