Sápmi |

AHR:s leat fuolas, gergetgo gieđahallat áiggil váidagiid Sámedikki válgalogahallamis – Sámedikki ságadoalli: "Dárbbašat lasi áiggi válgaprosessii"

Sámedikki jienastuslogus dahkkon váidagiid mearri lea maŋimuš válggaid áigge lassánan.

Korkeimman hallinto-oikeuden presidentti Kari Kuusiniemi
Alimus hálddahusrievtti presideanta Kari Kuusiniemi mielas lea hui eahpesihkkar, ahte AHR geargá gieđahallat váidagiid válgalogahallamis ovdal sámediggeválggaid. Govva: Juha Kivioja / Yle

Sámediggeválggat lahkonit, muhto válgalogahallamis lea ain oalle moivi. Sámedikki stivrra beavddis leat dál vuordimin sullii 240 njulgengáibádusa, mat gusket válgalávdegotti mearrádusaid válgalogahallamii dohkkeheames. Dan maŋŋá go stivra lea daid gieđahallan, dain sáhttá váidit alimus hálddahusriektái (AHR).

Alimus hálddahusrievttis ballet, ahte sii eai geargga gieđahallat buot válgalogahallamii guoski váidagiid áiggil ovdal válggaid, mat galget doaimmahuvvot 2.–30.9.2019.

– Jos Sámedikki stivra gieđahallá váidagiid easka borgemánu loahpabealde ja jos dain dasto váidojuvvo alimus hálddahusriektái, mas čuovvu dieđus dábálaš gullanmeannudeapmi duopmostuolus, de orru hui eahpesihkkar, juobe eahpevuorddehahtti, ahte mearrádusat gearggašedje čakčamánu loahpa rádjai, dadjá alimus hálddahusrievtti presideanta Kari Kuusiniemi.

Sámedikki ságadoalli Tiina Sanila-Aikio fuopmášahttá, ahte Sámediggi lea gal figgan oažžut válgaprosessii lasi áiggi.

– Sámediggi lea hui čielgasit buktán ovdan dan, ahte dárbbašit lasi áiggi válgaprosessii. Iešalddes maŋimuš evttohusas sámediggelága nuppástuhttimin lei oktan ođastussan dárkkuhus váikkuhit dasa, ahte dát áššit eai čoggoše áiddo dán jahkái mii lea ovdal válggaid, muitala Sanila-Aikio.

Váidagiid mearri lassánii jo ovddit válggaid áigge

Sámedikki stivra gieđahallá váidagiid borgemánu nubbin maŋimuš vahkus.

– Dát vuđolaš bargu, maid válgalávdegoddi dán rádjai lea bargan, váldá iežas áiggi. Iežamet oasil mii figgat fuolahit ášši gieđahallamis ja AHR:ii báhcá de dat áigi mii lea. Dán áigetávvalii mii eat sáhte dahkat eará go bargat buoremus lági mielde ja gieđahallat áššiid nu jođánit go vejolaš, dadjá Sanila-Aikio.

Válgalogahallamii bohte álgojagi badjelaš 550 ohcamuša, main badjelaš 200 dohkkehuvvojedje. Giđa áigge válgalávdegoddi fidnii badjelaš 280 njulgengáibádusa mearrádusain, main lávdegoddi lei hilgon ohcamuša válgalogahallamii merkemis čavčča sámediggeválggaid várás.

Sámediggelága mielde válgalávdegotti mearrádussii duhtameahttun olmmoš sáhttá bidjat njulgengáibádusa Sámedikki stivrra gieđahallamii. Dál Sámedikki stivrii leat ollen sullii 240 njulgengáibádusa.

– Eahpidan, ahte buohkat eai leat šat ohcan njulgema, árvala válgalávdegotti ságadoalli Janne Näkkäläjärvi.

Jo ovddit válggain lei vuhttomis, ahte válgalogahallamii ohcan olbmot háliidit mannat čađa olles váidinbálgá. Jagi 2011 AHR dohkkehii njeallje ođđa olbmo jienastuslohkui ja jagi 2015 dat dohkkehii 93 ođđa jienasteaddji Sámedikki válgalávdegotti ja stivrra mearrádusaid vuostá. Jagi 2011 váidagat eai lean go vihtta, muhto ovddit válggaid áigge jagis 2015 váidit ledje juo 182.

Varrasamosat: Sápmi

Váldoođđasat

Varrasamosat

Muualla Yle.fi:ssä