Sápmi |

Aili Keskitalo: Gollegiella-bálkkašupmi inspirašuvdnan giellabargiide

Norgga sámedikki presideantta Aili Keskitalo mielas dakkár giellabálkkašumis lea symbolalaš mearkkašupmi, mii lea olu stuorát go bálkkálaš ruđalaš árvu. Maiddái Suoma sámedikki ságadoalli Näkkäläjärvi mielas giellabálkkašumit leat dehálaččat, go dat muittuhit, man stuorra bargu lea unnit gielaid giellabargiiguin.

Video: oddasat 20141124

Gollegiella lea sámiid oktasaš bálkkašupmi sidjiide geat leat áŋgiruššan sámegielaid buorrin. Dán jagi bálkkašupmi geigejuvvui golbma sierra suorggi giellaolbmui, nuortalašgiela oahpaheaddjái Seija Sivertsenii, davvisámegiela professorii Mikael Svonnii ja girječálli Kerttu Vuolabii.

Bálkkašupmi ii leat ruđalaččat nu stuoris, dušše 15 000 euro. Muhto bálkkašumi árvu leage das, ahte Sápmi háliida addit dovddastusa giellačehpiid bargui, árvala Suoma sámedikki ságadoalli Klemetti Näkkäläjärvi. Ruhtabálkkašumis lea su mielas unnit mearkkašupmi.

– Mun jáhkán, ahte bálkkašuvvon olbmui lea stuorra árvu das, ahte lea ožžon dakkár Gollegiella-bálkkašumi. In mun jáhke dat ruhta nuge lea nu stuorra ášši. Dat lea eambbo juste dat, ahte oažžu dovddastusa.

Näkkäläjärvi mielas liikka Gollegiella ja eará giellabálkkašumit leat dehálaččat, go dat muittuhit, man stuorra bargu lea unnit gielaid giellabargiiguin.

– Dat lea iešalddes kulturdáhkku go bargá unnitlogu gielain ja kultuvrrain, dat lea rahčamuš jo iešalddes, Näkkäläjärvi dadjá.

Bálkkašumi bokte fuomášumi giellabarggu dárbbuide

Norgga sámedikki presideanta Aili Keskitalo mielas Gollegiella -giellabálkkašumis lea viidát servodatlaš mearkkašupmi.

– Dat oktiibuot muitala dan oppalaš giellabarggu birra. Ahte mii fertet hui ollu bargat gielain sierra servodatsurggiid siste, jus mii duođai háliidit sihkkarastit sámegiela boahtteáiggi, čilge Keskitalo oainnus.

– Mun sávan maiddái ahte dakkár bálkkašumiid bokte mii oažžut fuomášumi maid sámi servodaga siste giellabarggu dárbbuide. Mii diehtit ahte leat ollu giellaáššit maid berrešeimme dutkat ja ahte erenoamážit smávit sámegielat dego nuortalašgiella dárbbašit buoret doarjaga servodagas, dadjá Norgga sámedikki presideantta Aili Keskitalo.

Giellabarggu čalmmustahttima bokte sáhttá Keskitalo mielas maid movttiidahttit boahttevaš giellabuolvvaid geavahit eatnigielas

– Mun sávan ahte sámi servodagas oidnet ahte giellabarggus lea árvu go dat sáhttá dagahit dan ahte eanet mánát ja nuorat oidnet, ahte lea veara bargat ja geavahit sámegiela. Ja ahte lea veara oahppat sámegiela maid.

Giellabálkkašumi bokte jaskatge bargan giellabargit ožžot Keskitalo mielas dan fuomášumi maid sii ánssášit.

– Mu mielas dat odne geigejupmi govve dan, ahte mis leat ollusat geat hui áŋgirit máŋggaid jagiid leat bargan sámegiela ovddideami ovdii.

Bálkkašupmi inspirašuvdnan giellabargiide

Maiddái Keskitalo mielas dakkár giellabálkkašumis lea symbolalaš mearkkašupmi, mii lea olu stuorát go bálkkálaš ruđalaš árvu.

Keskitalo sávváge ahte giellabargit ožžošedje fámuid bálkkašumis bargat ovddos guvlui.

– Mun sávan, ahte dat geat leat ožžon dan bálkkašumi, dat ožžot bálkkašumis inspirašuvnna. Ahte dat oainnašedje, ahte sámi servodat ja maiddái Davviriikkaid servodat háliida loktet giellabargiid ovdan ja maid čalmmustahttit buohkaid geat viššalit barget gielain.

Varrasamosat: Sápmi

Váldoođđasat

Varrasamosat

Muualla Yle.fi:ssä