Sápmi |

Aili Keskitalo: Interneahtta ja sosiálalaš media lea oarjemáilmmi stuorimus skeaŋka sámiide

Sápmelaččaide geat eai máhte suomagiela lea muhtumin lossat čuovvut Suomabeale ságastallama sámeáššiid birra, oaivvilda Norgga sámedikki presideantta Aili Keskitalo. Son ávžžuha politihkkariid atnit ávkin ođđa media lávddiid, vai ipmárdus goabbat beal ráji nuppiid dili buorránivččii.

Norgga sámedikki presideantta Aili Keskitalo lea ieš aktiivvalaččat mielde sosiála medias, nu Twitteris, Instagramis go Facebookisge.

Su mielas dat leat dehálaš lávddit politihkkariidda.

– Mu mielas interneahtta ja sosiálalaš media lea oarjemáilmmi stuorimus skeaŋka midjiide sámiide, go mii orrut nu viiddis guovllus ja lea hástalus gulahallat, suokkardallá Keskitalo.

– Ja mii galggašeimme máhttit dan vel buorebut geavahit ávkin midjiide, son cealká.

Keskitalo lea váillahan ealli servodatdigaštallama

Aili Keskitalo viggá čuovvut mielde maid Suoma politihkalaš ságastallama.

Dat lea goitge muhtumin váttis sutnje, go nu ollut áššiin leat dušše suomagillii.

– Dan dihtii háliidivččen mun áinnas lohkat eambbo ságaid Suomabeale sámis sosiála media bokte. Ja eandalitge davvisámegillii, go dat lea lunddolaš gulahallangiella midjiide, geat orrot goabbat beal ráji.

Keskitalo mielas áššiid čuovvuma dahká giellagažaldaga lassin maid váilevaš servodatdigaštallan. Son váillahage mielde ealli digaštallama.

– Go viggan čuovvut mielde, de muhtumin váillahan ealli servodatdigaštallama Suomabeale sámiid áššiid birra.

– Nu ahte áinnas oainnašin, ahte sámi politihkkarat eambbo geavahivčče sosiála media buorrin servodatdigaštallamiin.

Servodatdigaštallankultuvrra buorideapmi buoridivččii maid ipmárdusa nuppiid dilis

Aili Keskitalo muitala, ahte Norggabeale olbmuid dávjá kritiserejit, ahte sii eai doarvái bures ipmir dili Suomabealde.

Dan son ii ollasit mieđit duohtan, muhto oaivvilda, ahte jus sámepolitihkkarat livčče eambbo mielde ságastallamis vaikko sosiála medias, livččii álkkit oažžut duogašdieđuid áššiin.

– Mun gulan dávjá, ahte mii Norggabeal eat riekta ipmir Suomabeale dili. Ja dat sáhttá leat nu, ahte mii eat riekta ipmir.

– Muhto maid dasa livččii ávkin ealli servodatdigaštallan Suomabealde. Ahte mii ipmirdivččiimet buorebut ahte makkár ákkat leat duogábealde iešguđetge Suomabeale oaiviliin, smiehtada Keskitalo.

Oktasaš sámi servodatdigaštallan rástá riikkarájiid

Aili Keskitalo muittuha, ahte sápmelaččat leat okta álbmot.

Son váillahage digaštallamii viidát sámi perspektiivva, mii govččašii olles Sámi.

– Mun oainnášin hui mávssolažžan, jus mii nagodivččiimet boktit dán oktasaš sámi servodatdigaštallama, go miihan leat okta álbmot vaikko orrut njealji riikkas, suokkardallá Keskitalo ášši obbalažžan.

Guldal Aili Keskitalo olles jearrahallama Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä