Sápmi |

Ailo-filbma čájehuvvui bovdejuvvon gussiide Ohcejogas – Báikkálaččat jáhkket filbmaindustriija buktit Ohcejohkii lasi turisttaid

Ailo-filbma lea govvejuvvon oassái Ohcejoga duoddariin. Báikkálaččat sávvet lassánan filbmaindustriija gádjut Ohcejoga ja buktit dietnasa turisttaid bokte.

“Ailo – Pienen Poron Suuri Seikkailu” filbma čájehuvvui máilmmis vuosttas geardde Ohcejogas 27.11.2018.
"Ailo – Pienen Poron Suuri Seikkailu" čájehuvvui máilmmis vuosttas geardde Ohcejogas 27.11.2018. Govva: Vesa Toppari / Yle

Ođđa suopmelaš, olles bearraša ealligovva "Ailo – Pienen Poron Suuri Seikkailu" čájehuvvui máilmmis vuosttas geardde Ohcejogas gaskavahku.

Bovdejuvvon guossin vuosttasčájáhusas lei maiddái turismafitnodatdoalli Petteri Valle. Su bearraša bohccuin lei dehálaš rolla dán stuorra filmmas.

– Suohtas oaidnit maid dat leat ožžon áigái, go nu máŋga jagi govviimet dan. Barggus ledjen doppe.

– Iihan dat okto sáhte leat dat Áilo, fertejithan das earáge bohccot leat. Herggiiguin leimmet das ja ledjehan das muhtin čearpmahatge. Dat lei eambo dakkár, ahte dat ledje mielde das Áilo skihpárin, muitala Valle.

Elokuvasta Ailo
Ailo-filbma muitala bohcco vuosttas eallinjagis. Govva: MRP Matila Röhr Productions Oy

Ohcejohka lea šaddamin bivnnuhis govvenbáikin. Ailo-filmma lassin doppe leat govven osiid ođđa suopmelaš Ivalo-ráiddus ja ođđajagimánus álget ođđa filbmemat, go Ohcejogas govvegohtet Kaamos-rihkusráiddu. Gielddaráđđehusa ságadoalli Ilmari Tapiola vuordá boahtteáiggi mojunjálmmiin.

– Gal mun jáhkán, ahte Ohcejohka boahtá buorebut oidnot máilmmikárttas. Dán áigge go leat máŋggalágan bongarit. Dat bohtet geahččat gos dat lea govvejuvvon, go Ohcejoga namma boahtá eambo oidnosii. Mun jáhkán, ahte olbmot bohtet eanet deike, árvala Tapiola.

Valle lea ovttaoaivilis. Filbmaindustriija sáhttá leat guktuid mielas dat, mii gádju Ohcejoga das, go masse ođđa Deanusoahpamuša dihte nu olu turisttaid. Stuorra filbmenjoavkkut ealáskahttet Ohcejoga.

– Das lea stuorra mearkkašupmi. Ii dušše dán filmmas, muhto máŋgga earásge, maid dáppe govvejit. Gal das lea váikkuhus, dasa mun gal jáhkán, dadjá Valle.

– Gal dás ferte leat gal duđavaš ahte eanet ja eanet bohtet olbmot deike. Ovdalhan dáppe ii skábman oidnon olus oktage ja dál lihkká jo olbmot oidnojit doppe gilis, joatká Tapiola.

Marko Röhr.
Buvttadeaddji Marko Röhr lohpida, ahte olbmot gal bohtet dovdat Ohcejoga duovdagiid. Govva: Vesa Toppari / Yle

Lohpida, ahte Ohcejohka oidno filmmas

Ailo-filbma muitala bohcco vuosttas eallinjagis. Filbma lea ovddalgihtii vuvdojuvvon badjel 30 sierra riikii, gitta Japána ja Kiinná ráje, muitala buvttadeaddji Marko Röhr. Dábálaš olbmot besset oaidnit filmma filbmateáhteriin 21.12.2018 rájes.

Filmma leat govven olu maiddái Ohcejogas. Buvttadeaddji lohpida, ahte olbmot gal bohtet dovdat Ohcejoga duovdagiid.

– Mii leat govven olles Lappis. Govviimet 500 diimmu materiála ja olles filbma lea badjelaš 80 minuhta. In muitte man galle minuhta Ohcejohka oidno. Jáhkán, ahte báikkálaččat gal dovdet govain, gos leat. Filmmas oidno duottar, eaige ovdamearkka dihte Norgga čohkka gáissát.

– Oaidnit leaš man olu deike šuvihit olbmot dán filmma maŋŋá, smiehtada Röhr.

Varrasamosat: Sápmi

Váldoođđasat

Varrasamosat