Sápmi |

Ailu Valle oažžu mánáidkultuvrra stáhtabálkkašumi

Mánáidkultuvrra stáhtabálkkašupmi lea buot stáhtabálkkašumiin stuorámus, 30 000 euro. Bálkkašupmi geigejuvvo Vallei bearjadaga Helssegis.

Ailu Valle
Rap-musihkkár Ailu Valle bálkkašuvvo barggustis mánáid- ja nuoraidkultuvrra buorrin. Govva: Marko Vasara

Rap-musihkkár Ailu Vallei addojuvvo mánáidkultuvrra stáhtabálkkašupmi.

34-jahkásaš Valle ráppe davvisámegiela lassin suoma- ja eaŋgasgillii. Valle lea eret Ohcejoga Gámasmohkis, muhto orru dán áigge Anáris.

Sámeeatnama lassin Ailu Valle lea johtán dáidagiinnis miehtá máilmmi. Valle lea almmustahttán golbma skearru, main ođđasamosa, Viidon sieiddit, dán jagi.

Mánáidkultuvrra stáhtabálkkašumi leaba árat ožžon sápmelaš dáiddárat Merja Aletta Ranttila (1993) ja Inger-Mari Aikio (2015).

"Juohkehaččas lea riekti dáidagii iežas gillii"

Mánáidkultuvrra stáhtabálkkašupmi lea 30 000 euro ja dan vállje dáidaga ovddidanguovddáš Taike hoavda Paula Tuovinen.

Bálkkašumi ákkastallet earret eará dainna, go rap-musihkas lea iežas sadji nuoraid máilmmis. Vaikko rap leage bivnnut buot ahkejoavkkuin, lea das earenoamáš mearkkašahtti rolla nuoraid eallimis. Nuoraidkultuvrras fas lea mearkkašupmi máná ja nuora bajásšaddamii.

Muhtun nuoraide rap lea maid iežas vuohki čájehit áššiid, Taikes fuomášahttet. Dat sáhttá movttiidahttit nuoraid servodatlaš áššiide dahje fievrridit sin servodatlaš muitalusaid, bálkkašumi ákkastallamiin čuožžu.

Ailu valle Anár Inari saamelaisten kansallispäivä sámi álbmotbeaivi
Taike atná Ailu Valle buorre ovdamearkan mánáide ja nuoraide das, ahte dáidaga sáhttá bargat iežas vugiin makkár beare kultuvrralaš dahje gielalaš duogážiin. Govva: Vesa Toppari / Yle

Ailu Valle musihkka lea máŋggakultuvrralaš. Su atnet buorre ovdamearkan mánáide ja nuoraide dan vejolašvuođas, ahte dáidaga sáhttá bargat iežas vugiin makkár beare kultuvrralaš dahje gielalaš duogážiin.

Ákkastallamiin daddjo maiddái, ahte Valle bargu dáiddárin nanne unnitlogugielat mánáid ja nuoraid identitehta: juohkehaččas lea riekti dáidagii iežas gillii.

Valle bálkkašupmi lea stáhtabálkkašumiin stuorámus

Stáhta dáiddadoaibmagottit juhket stáhtabálkkašumiid jahkásaččat. Dán vuoro juolludedje oktiibuot 14 bálkkašumi.

Mánáidkultuvrra stáhtabálkkašupmi lea dain ruđalaččat stuorámus, 30 000 euro. Máŋggadáidaga bálkkašupmi lea 28 000 euro ja eará bálkkašumit 14 000 euro.

Bálkkašumit geigejuvvojit bearjadaga beaivet Suoma álbmotoperas Helssegis. Bálkkašumiid juohká dieđa- ja kulturministtar Hanna Kosonen.

Arkitektuvrra stáhtabálkkašupmi addojuvvui dán háve arkitekta Gretel Hemgårdii ja hábmema stáhtabálkkašupmi Korutaideyhdistys ry:i. Ealligovvajournalista Kalle Kinunnen oaččui ealligovvadáidaga bálkkašumi. Teahterbihttáčálli Heini Junkkaala ja dánsundáiddár Liisa Pentti oaččuiga ovdanbuktindáidagiid bálkkašumiid.

Girjjálašvuođa stáhtabálkkašumi oaččuiga girječálli Eeva Kilpi ja diktačálli Cia Rinne. Musihka stáhtabálkkašumiid oaččuiga operalávlu Camilla Nylund ja musihkkár Paula Vesala.

Visuálalaš dáidagiid bálkkašumiid fidnejedje govvadáiddár Jukka Korkeila, čuovgagovvadáiddár Tiina Itkonen ja mediadáidaga áššedovdi Perttu Rastas. Máŋggadáidaga stáhtabálkkašumi oaččui dáiddár Jenni-Juulia Wallinheimo-Heimonen.

Varrasamosat: Sápmi

Váldoođđasat

Varrasamosat

Muualla Yle.fi:ssä