Sápmi |

Akšunisttat leat olles geasi caggadan ruvkke huksenbargguid Riehpovuonas – Beaska Niillas: Mun gal áiggon dán ášši čuovvut gitta lohppii

Nussir-ruvkke huksenbarggut galge álgit suoidnemánus, muhto dat leat maŋŋonan vuosttáldeami dihte. Birassuodjaleaddjit ja boazodoallit eai dohkket dan, ahte ruvkefitnodagas lea vuoigatvuohta luoitit ruvkebázahusaid Riehpovutnii.

Niillas Beaska
Beaska Niillas lea čuvvon Nussir-ášši jo fargga logemat jagi. Son jáhkká, ahte sii bastet bissehit ruvkke huksema. Govva: Norgga Sámiid Riikkasearvi

Veaikeruvkke huksenbarggut eai leat vel beassan johtui Riehpovuonas, Fálesnuoris. Sámepolitihkkar Beaska Niillas muitala, ahte guovllus leat geahččalan gal álggahit huksenbargguid suoidnemánus, muhto akšunisttat leat bastán caggat daid.

– Dat leat ovtta rokki geargan goaivut, muhto de deive leat akšunisttat viehka jođánit báikki alde ja dat gal láhkkiiguin lohkkadedje gitta goaivunmášenii. Dat gal šadde beare heaitit. Dat leat guktii vikkan álgit, muhto eai dat lea bastán nu issorasat dáppe moivet, muitala Beaska Niillas, gii lea okta akšunisttain.

Norgga eiseválddit mieđihedje moadde jagi dassái doaibmalobi Nussir ASA -ruvkefitnodahkii ja lobi maid luoitit ruvkebázahusaid Riehpovutnii. Fitnodat oaččui lobiid das fuolakeahttá, ahte birassuodjaleaddjit ja boazodoallit leat vuostálastan fidnu sakka.

Nussir ASA -ruvkefitnodat lea dahkan birrasiid miljárdda euro soahpamuša veaikki vuovdimis duiskalaš fitnodahkii Aurubis AG:ai. Soahpamuša mielde Aurubis AG oastá ruvkkes buvttaduvvon veaikki unnimustá logi jagi áigge. Aurubis AG lea okta stuorimus veaikki buvttadeaddjiin máilmmis.

Beaska Niillas muitala, ahte báikkálaš orohat lea váidán áššis bolesii, go ruvkefitnodat álggahii goaivunbargguid njárggas.

– Orohat bijai váidaga bolesii, ahte diet lea eahpelobálaš goaivun, dain eai leat buot báhpárat ortnegis. Orohat lea vel dan dieđihan, ahte sii áigot váidit stáhta dan ruvkelobi dihtii.

Nussir-ruvkefitnodaga jođiheaddji Øystein Rushfeldt muitala NRK:ii, ahte son lei vuordán, ahte huksenbarggut dagahit vuostálastindoaimmaid.

Akšuvdnasiida ceaggánii mihcamárain

Akšunisttat leat leamaš Riehpovuonas báikki alde mihcamáreahkeda rájes. Álggos akšuvnnas eai lean beare gallis, muhto mearri lea lassánan geasi áigge, muitala Beaska Niillas.

Báikki alde leat sápmelaččaid lassin maid eará luondduberošteaddjit. Ellos Vuotna -akšuvdna lea beakkehan geasi áigge maid sosiála mediain.

– Dáppe leat luonddu nuorat, dárogillii Natur og ungdom. Dat lea hirbmat stuorra našunála searvi Norgga bealde, gos leat nuorat mat beroštit luonddus. Ja de lea luonddugáhttenlihttu ja de leat mii NSR:s searvan dákkár ovttasbargui dainna guovtti joavkkuin. Ovttasráđiid vikkat dan siiddastallama doallat dáppe ja olbmuide fállat idjasaji ja borramuša ja diekkára vai sáhttet boahtet veahkkin.

Akšunisttat leat ráhkkanan vuostálastit ruvkke huksema gitta loahpa rádjái.

– Álgojurdda lei stuorradikki válggaid rádjái dáppe leat, muhto dat orru gal ahte jus álget goaivut dál jo čavčča mielde, de gal dat ferte dalle guhkit orrut ja viggat maŋidit dan goaivuma ja bilideami nu guhká go vejolaš, dadjá Beaska Niillas.

Son lea čuvvon ášši jo fargga logemat jagi iige áiggo vuollánit.

– Mun gal áiggon dán ášši čuovvut gitta lohppii, dassážii go mii leat bissehan dan ruvkke. Mii leat ovdal nagodan bissehit stuorra áššiid gitta loahpas ja nu lea dieđusge dálge vejolaš.

Guldal dás maid akšunistta Niillas Beaska muitala Ellos Vuotna -akšuvnnas Riehpovuonas Norgga bealde. Jietna: Susanna Guttorm / Yle

Lágidit vahku geažes musihkkafestivála Riehpovuonas

Riehpovuonas áigot vahku geažes lágidit musihkkafestivála, muitala okta akšunisttain ja festiválajođiheaddji Ella Marie Hætta Isaksen Ávvir-avisii. Ulbmilin lea fállat oktasaš deaivvadansaji akšunisttaide ja báikkálaš olbmuide. Ruvkedoaibma lea bohciidahttán garra ságastallama ja iešguđetlágan oaiviliid.

Festivála lea nuvttá buohkaide, ja Hætta Isaksen lohká sis lea vejolašvuohta váldit vuostá 200 olbmo festiválii.

Dássážii leat čieža artistta dieđihan, ahte bohtet. Earret eará galget Mari Boine, Emil Karlsen ja ieš Ella Marie Hætta Isaksen čuojahit lávddi alde.

Yle Ođđasiid Sámis ja Beaivvi ságaid sáhtát maid guldalit Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä