Sápmi |

Álbmotealáhatlágádus lea álggahan rávvenbálvalusa Eanodagas

Leena Palojärvi rávve eanodatlaččaid Álbmotealáhuslágádusa áššiiguin juohke duorastaga Sámisoster-searvvi doaibmabáikkis Eanodaga gielddaviesus.

Jietna: Leena Palojärvi
Jietna
Álbmotealáhatlágádusa doaibmabáikkis barggus lea SámiSoster-searvvi Birgen Ruovttus -doaimma doaibmabagadalli Leena Palojärvi. Minna Näkkäläjärvi jearahalai su duorastaga 7.6.2018.

Go Heahtá bargofápmodoaimmahaga maŋimusge bargi vulggii ealáhahkii golggotmánu loahpas 2017, heaittihuvvui seammás Álbmotealáhatlágádusa doaibmabáiki Eanodagas, danin go bargofápmodoaimmahaga bargit dikšo maid Álbmotealáhatlágádusa áššiid.

Dál Eanodaga gieldda ja Álbmotealáhatlágádusa oktasaš soahpamušas Álbmotealáhatlágádusa doaibmabáiki lea fas rahppojuvvon álot ovtta beaivái vahkus. Álbmotealáhuslágádusa áššiiguin sáhttet eanodatlaččat dás ovddosguvlui fitnat Eanodaga gielddaviesus, SámiSoster-searvvi doaibmabáikkis.

Rávvenbálvalusat leat oažžumis juohke duorastaga diibmu 9 - 15. ÁEL doaibmabáiki lea geasseluomus olles suoidnemánu ja borgemánu vuosttas vahku.

Rávvejit mo galgá dikšut ÁEL áššiid

Áššehasrávvejeaddjin Álbmotealáhatlágádusa doaibmabáikkis lea SámiSoster-searvvi Birgen Ruovttus -doaimma doaibmabagadalli Leena Palojärvi. Su bargun lea rávvet olbmuid ovdamearkka dihte das, mo galgá ohcat doarjagiid ja váldit oktavuođa Álbmotealáhuslágádussii. Son maid váldá vuostá báhpáriid, maid galgá doaimmahit ÁEL:ii.

– Mun in daga maidige mearrádusaid inge diekkáriid, muhto mun dušše rávven, movt galgá dahkat ja movt oažžu oktavuođa dohko.

Leena Palojärvi lea rabas mielain álggahan ođđa doaimmas.

– Doaivumis dat álgá doaibmat bures ja olbmot gávdnet deike, dadjá Palojärvi.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä