Sápmi |

Alimus hálddahusrievtti presideanta: ON olmmošriektekomitea cealkámuššii laktása boasttoipmárdus

Alimus hálddahusrievtti presideanta Kari Kuusiniemi muitalii TV1:ža Ykkösaamu-prográmmas, ahte son lei ieš dahkamin Sámedikki válgalogahallamii guoskevaš mearrádusaid.

Jagis 2015 alimus hálddahusriekti dohkkehii 93 jienasteaddji Sámedikki válgalogahallamii Sámedikki dáhtu vuostá. Vahku dassai Ovttastuvvan Našuvnnaid olmmošriektekomitea almmuhii, ahte sin oainnu mielde alimus hálddahusriekti lea meannudan boastut áššis ja rihkkon sápmelaččaid eamiálbmotrivttiid.

ON čoavddus lea boktán máŋggalágán jurdagiid. Ovdamearkka dihte Helssega universitehta stáhtavuogádaga professor Tuomas Ojanen mielas ON čoavdduš čájeha, ahte alimus hálddahusriekti lea mannan doaibmaválddis badjel.

Alimus hálddahusrievtti presideanta Kari Kuusiniemi lei ieš mielde dahkamin válgalogahallamii guoskevaš mearrádusaid. Son oaivvilda leat čielggas, ahte riikkaidgaskasaš bearráigeahččanorgánaid ja áššedovdevaš professoriid kritihka galgá váldit duođas.

– Jos dás šaddá muhtin johtuibidjan alimus hálddahusrievttis, lea aivve čielggas, ahte ieš in oassálastte mange láhkai dan gieđahallamii inge gieđahallama ordnemii. Dalle mis leat bealehis duopmárat dan čoavdime.

Olmmošriektekomitea čoavddus čujuhuvvon stáhtii, ii alimus hálddahusriektái

Kari Kuusiniemi dadjá, ahte vehádagaid rivttiid gudnejahttin lea riektestáhtain duopmostuoluid guovddáš ulbmil.

Ovttastuvvan Našuvnnaid olmmošriektekomitea ii su mielas goittotge leat lohkan sin, alimus hálddahusrievtti, sámedikki guoskevaš mearrádusaid dárkilit. Kuusiniemi mielas ON olmmošriektekomitea cealkámuššii laktása boasttoipmárdus.

– Olmmošriektekomitea čovdosis lea daddjon, ahte alimus hálddahusrievtti mearrádusain sápmelašmeroštallama dulkon lea vuođđuduvvan dušše iešidentifiseremii ja ollislaš meroštallamii, ja ahte objektiivvalaš kriterat livčče duvdon eret. Objektiivvalaš kriterat leat golbma; giellakritera, nállašuvvankritera ja vánhemiid, áhkuid ja ádjáid merken jienastuslohkui. Mu ipmárdus lea, ahte ná ii leat dáhpáhuvvan.

Alimus hálddahusrievttis válgalogahallama guoskevaš linnjá rievddai jagis 2011. Kuusiniemi muitala linjá rievdama sivvan dan, go ON nállevealaheami vuostásaš komitea CERD anii ovddit dulkomiid sápmelašmeroštallamis menddo gáržin. CERD attii goittotge jagiid 2012 ja 2017 guokte ođđa linnjema, main deattuhuvvojedje sápmelaččaid iešmearrideapmi ja joavkodohkkeheapmi.

Suomas lea guhtta mánotbaji áigi vástidit ON ávžžuhussii. Kuusiniemi deattuha, ahte ON olmmošriektekomitea čoavddus lea čujuhuvvon namalassii Suoma stáhtii iige alimus hálddahusriektái.

Dievasmahtton 11.2.2019 diibmu 16:35 dieđuin CERD varrasot linjáin.

Varrasamosat: Sápmi

Váldoođđasat

Varrasamosat

Muualla Yle.fi:ssä