Koe uusi yle.fi
Sápmi |

Almmái suoládii ruđa bargobáikki speallanmášenis ja studeantagotti konttus – oaččui sáhkkoráŋggáštusa guovtti gávildeamis

Golmmalot jahkásaš almmái lea dubmehallon Lappi gearretrievttis guovtti gávildeamis.

Pelikoneita.
Govva: Laura Tolonen / Yle

Golmmalot jahkásaš almmái lea ožžon sáhkkoduomu guovtti gávildeamis Lappi gearretrievttis. Almmái lei gávildan iežas bargobáikki restoráŋŋa kássamášenis ruđa Roavenjárggas ja váldán ruđaid maid restoráŋŋa ruhtaspeallanautomáhtas jagis 2012.

Almmái gávnnahalai restoráŋŋa gohcinkamera vuođul. Restoráŋŋas navdigohte rihkosa, go kássamášena ja speallanautomáhta ruhtačilgehusain ledje vuolláibáhcagat.

Gohcinkameras oidnui mo almmái lei restoráŋŋa giddema maŋŋá báhcán speallat ruhtaautomáhtamášeniiguin, rahpan daid ja váldán doppe ruđaid alcces. Boles jearadeamis almmái lei muitalan, ahte sus lea speallanváttisvuohta.

Suoládii maid anárlaš oahppolágádusa studeantagottis ruđa

Dan lassin almmái lei gávildan ruđa jagi 2015 áigge anárlaš oahppolágádusa studeantagottis. Son lei sirdán studeantagotti konttus ruđa badjelaš 2 000 euro iežas báŋkokontui.

Almmái oaččui guovtti gávildeamis ráŋggáštuššan oktiibuot 65 beaivesáhku. Son dubmehalai máksit dan lassin oktiibuot 3 000 euro dan ovddas maid lei gávildan. Oassi restoráŋŋas gávilduvvon ruđain ledje jo gessojuvvon eret albmá bálkkás.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä