Sápmi |

Amoc: Ođđa skearrus leat jierbmásot áššit ja globála fáttát

Guhkes bottu maŋŋá lea Amocis, Mikkâl Morottajas, boahtimin ođđa skearru. Ođđa skearrus leat jierbmásot áššit ja globála fáttát, Amoc muitala Yle Sámi Geasseguossi-prográmmas.

Jietna: Amoc Geasseguossi-jearahallan anárašgillii. Amocin haastattelu inarinsaameksi ja musiikkia Yle Saamen Kesävieras-ohjelmassa.

Anáraš ráppejeaddji Amocis lea boahtimin ođđa musihka sihke okto ja ovttasbarggus.

Ovddit skearru almmustuvvamis lea gollán juo measta logi jagi. Amoc lea gal bargan musihka, muhto ii leat almmustahttán bihtáid. Son oaidná, ahte lea musihka bokte rávasmuvvan.

– Ođđa skearrus leat jierbmásot áššit, son dadjá.

Amoc lea dál moadde jagi bargan ođđa skearruin. Teavsttat leat juo gárvvisin, musihkatge eanaš.

– Jurddan lei, ahte livčče dego ealli muitalusat, fabelat. Livčče goit globála fáttáid birra, muhto goittotge diekkárat, ahte daid livčče somá guldalit, Amoc muitala.

– In velge dieđe, mii ođđa skearru namma lea, sávan dušše ahte leat buorit bihtát. Skearru bargonamma lea “Puátteevuođâ uáinuh”.

Vuosttas digisingle “Kiälláseh” almmustuvvá Ijahis Ija áigge

Ulbmilin lea, ahte Amoca ođđa skearru vuosttas digisingle almmustahttojuvvo Ijahis Idja -festivála áigge.

Dan oktavuođas almmustuvvá maid musihkkavideo. Bihtá namma lea “Kiälláseh” ja das lea mielde ráppár Ailu Valle.

Amoc muitala, ahte bihttá lea dego dáistaleapmi su ja Ailu Valle gaskas.

– Bihttá lea battle munno gaskas. Mus lea hippi-ideologiija, diekkár jáhkkut. Ailus fas dieđálaš jáhkkut.

– Geardinšuoŋa jurdda lea diekkár, ahte buohkat leat duihmmit. Viissis lea dušše dat, gii diehtá, ahte ii dieđe, Amoc dadjá Geasseguossi-programmas.

“Oaččui ráppet mas beare, go oktage ii ádden”

Anárlaš Mikkâl Morottaja nappo Amoc lea máilmmi vuosttaš ja áidna anárašgielat ráppar. Son ráppegođii 1990-logu loahpas ja almmustahttii vuosttaš skearrus jagis 2007.

Amoc muitala, ahte álggii dušše bargat musihka dihtoriin ja dasa ráppet, daningo ráppen lei hui álki sutnje.

– Dalle ráp-musihkka lei áiddo boahtán Supmii. Dahken somá dihte moadde bihtá suomagillii, Amoc muitala.

Logahagas Avvilis son goit mearridii, ahte álgáge ráppet anárašgillii.

– Mu mielas lei suohttasot ráppet anárašgillii, daningo liikon aggressiivalaš musihkii ja oaččui ráppet mas beare, go oktage ii ádden.

“Amoc lea alterego, dat lea rolla”

Mikkâl Morottaja muitala, ahte Amoc lea su alterego. Amoc leage hui earálagan, go Morottaja ieš.

– Amoc lea alterego, dat lea rolla. Dat lea dušše dan musihka dihte, go lean lávddi alde. Lea juoba vehá váttis jurddašit, ahte gii lea dat gii lea doppe lávddi alde, son smiehtada.

– Mikkal ja Amoc leaba aibbas earálaganat. Lean ieš ráfalaš ja ustitlaš. Amoc lea dieđusge diekkár, go keksen dan alterego go ledjen vel teini, rávasmanahkásaš. Liikojin viehkaválddalaš musihkkii.

Mikkâl Morottaja, Amoc, lei mielde Yle Sámi Radio Geasseguossi –programmas vuossárgga 25.7.2016. Jearahallan gullo nuppádassii bearjadaga diibmu 15.00.

Varrasamosat: Sápmi

Váldoođđasat

Varrasamosat

Muualla Yle.fi:ssä