Sápmi |

Anár birgii bures gieldalihtu čielggadeamis – gieldalaččat luhttet luohttámušolbmuide ja giitalit soabalaš áššiid dikšuma

Suoma gieldalihtu čielggadeami mielde Anára gielddas lea buorre vuoigŋa áššemeannudeami oktavuođas. Gieldalaččain lea maid stuorra luohttámuš gieldda njunnošiidda.

Toni K. Laine, Inari
Toni K. Laine mielas Anára gieldda áššiid dikšumis figget gávdnat kompromissaid. Govva: Vesa Toppari / Yle

Gieldalihttu lea gieskat almmuhan čielggadeami gielddaid siskkáldas vuoiŋŋa ja gávnnahan, ahte uhca gielddain, main ruhtadoallu lea dikšojuvvon bures, olbmot leat duhtavaččat virgeolbmuide, luohttámušolbmuide ja gieldda bálvalusaide.

Sierralágan riiddut gielddaid siste fas geahpedit olbmuid luohttámuša. Lappi gielddain Anára gielda birgii buoremusat, ja lei olles riikkadásis goalmmádin, dušše Juuka ja Keitele gielddat Nuorta-Suomas manne ovddabeallai.

Anára gieldda olbmot giitalit soabalaš áššemeannudeami

Anára gieldda ássit ja gielddahoavda rábmojit dan, man bures ja njuovžilit gielddas dikšot áššiid.

Anára gielddahoavda Toni K. Laine vuolláičállá gieldalihttu čielggadeami bohtosiid. Son namuha, ahte Anáris sierra oaiviliiguinge leat birgehallan bures.

– Mis lea guhkes áiggi leamaš dakkár stáđis vuoigŋa mearrideamis. Áššiid dikšumis leat sierra oaivilat dávjáge, muhto dáppe figget ovttas gávdnat kompromissaid, dadjá Laine.

Ville Kinisjärvi
Antti Ananin dadjá, ahte muhtin áššit sáhttet borrat luohttámuša gieldda njunnošiidda. Govva: Vesa Toppari / Yle
Gieldalaččatge eanaš rábmojit iežaset gieldda politihkkáriid ja virgeolbmuid áššemeannudeami.

– Dábálaččat luohtán, muhto in áibbas buohkaide, dadjá Ville Kinisjärvi.

– Na veháš manai luohttámuš, go dahkkojuvvui dat Nanguniemi lávvamearrádus. Nappo dat beakkán Jasper Pääkkönen, namuha Antti Ananin.

Marjo Tolonen
Marjo Tolonen mielas ekonomiijadikšun bures lasiha luohttámuša. Govva: Vesa Toppari / Yle
Anáris lea Lappi guovllu vuolimus vearroproseanta. Dat lea okta sivva, manin olbmot leat duhtavaččat, eaige moaitte nu ollu ruovttuguovlluset.

– Mis lea vuollegis vearroproseanta, mun gáttán ahte dat dahká ollu, namuha Marjo Tolonen.

Yle Ođđasiid Sámis ja Beaivvi ságaid sáhtát maid guldalit Yle Areenas. Dán áššis sáhtát geahččat lasi maid Yle Ođđasat -sáddagis TV 1 -kanálas diibmu 16.45.

Varrasamosat: Sápmi

Váldoođđasat

Varrasamosat

Muualla Yle.fi:ssä