Sápmi |

Anár gielddastivra hilggui evttohusa suomagiela dulkomis sámegielaide

Evttohusa dahkan Pirita Näkkäläjärvi mielde dulkon guovtti guvlui nannešii demokratiija gielddas.

Pirita Näkkäläjärvi
Pirita Näkkäläjärvi guđii gielddastivrra mearrádusas sierraoaivila. Govva: Pirita Näkkäläjärvi

Anára gielddastivra lea mearridan duorastaga 23.9. čoahkkimisttis, ahte gieldda doaibmaorgánaid čoahkkimiin ordnejuvvo dulkon dušše sámegielas suomagillii. Áššis mearridedje hálddahusnjuolggadusa nuppástuhttima oktavuođas.

Gielddastivrra áirras Pirita Näkkäläjärvi (Ruonát, čanasmeahttun) evttohii ievttá čoahkkimis, ahte aŋkke váldostivrras maiddái suomagielat sáhkavuorut dulkojuvvošedje sámegielaide. Dál sámegielat sáhkavuorut dulkojuvvojit suomagillii, muhto ii nuppegežiid.

Evttohus goittotge dáhpii jienain 5–21. Okta jietna bázii guorusin.

Gielddastivrra vuosttas várreságadoalli Anu Avaskari (Olgešbellodat Kokoomus) oaivvildii čoahkkimis, ahte dálá dilis manašii menddo ollu áigi, jus sáhkavuorut dulkojuvvošedje maŋŋálága golmma sámegillii. Son árvalii maid, ahte niehkodilli livččii oažžut simultánadulkoma buot sámegielaide. Avaskari háliida deattuhit stivrra duorastaga dahkan mearrádusa.

– Dáinna iešalddes buoriduvvui sámegielagiid dilli, go dulkogoahtit sáhkavuoruid davvisámegielas suomagillii ja áššebáhpárat jorgaluvvojit sámegillii. Dás leat gieđahallon stivrralahtuid gielalaš vuoigatvuođat, ii gieldalaččaide dulkon, oaivvilda Avaskari.

Näkkäläjärvi guđii áššis sierraoaivila. Son muittuhii duorastaga čoahkkimis, ahte dulkon ii leat dušše beare sámegielat áirasiid váras, baicca čoahkkimat leat ráhpasat ja daid sáhttá čuovvut gii beare. Son maiddái fuopmášuhttá, ahte simultánadulkoma sáhttá ordnet dábálaš dihtoriin.

– Simultánadulkon dagašii vejolažžan geavahit buot golmma sámegiela ja maiddái ovdamearkka dihte váhnemiideahkediid ja álbmogiidgaskasaš konferánssaid dulkoma. Dulkon guovtti guvlui nannešii demokratiija, dajai Pirita Näkkäläjärvi váldostivrra čoahkkimis.

Olles čoahkkin lea geahččanláhkai Anár gieldda Youtube-kanálas.

Beaivvi ságaid ja Yle Ođđasiid Sámis sáhtát maid guldalit Yle Areenas.

24.9. dii. 14.40 Ođas beaiváduvvon Anu Avaskari oaiviliin ja čoahkkinstreama liŋkkain.

27.9. dii. 10.26 lasihuvvon Avaskari sitáhta.

Varrasamosat: Sápmi

Váldoođđasat

Varrasamosat

Muualla Yle.fi:ssä