Sápmi |

Anára boarrásut olbmot besse galledit Lismmá olbmuid

Sámi sosial- ja dearvvasvuohtasuorggi searvi SámiSoster lea guovtti jagi áigge lágidan Anára boarrásiidda iešguđetlágan astoáiggedoaimmaid. Dábálaš čoahkkanemiid lassin lágidit maid ruoktoguovlomátkkiid, dán háve fitne oahpásmuvvamin Lismmá gillái ja olbmuide.

Smávva linjabiila lea jođus Lismmá gillái Anára gieldda fiestarmátta geahčái. Mielde lea ilolaš ja sáhkkes joavku go sii leat vuolgán oahpásmuvvat Lismmá gillái ja olbmuide. Aili Koskinen Anáris láve hástestit skihpára maid fárrui.

– Lávenhan mun vieččat dán Elle fárrui dohko, go dieđán son lea maid okto.

Sámi Soster-searvvii boarrásiid riekkis lea doaibman dál guokte jagi. Dábálaš čoahkkanemiid lassin besset galledit maid guhkelebbui ustibiid ja fulkkiid oktasaš sáhtuin. Dat lea máŋgasii áidna vejolašvuohta beassat johtui.

– Go mátkkit leat guhkit goit, máŋgasiin ii leat dakkár dilli, ahte ii vuoje ieš biilla. Ii duostta vuolgit vuodjit. Dasto ii akto duostta vuolgit gosage. Háliida ahte soames lea fárus fuolaheamen ja dasto go dat lea joavku, mun oainnán dat lea dakkár dorvu, dadjá Inger-Ánne Äärelä Sámi Soster -searvvis.

Anárlaš badjeolmmoš galledii Lismmá vuosttas geardde eallimisttis

Lismmá gilis Riitta Näkkäläjärvi leage vuordimin gussiid mállásiiguin. Dál son vel láibu gussiide go leahan bussemátkki maŋŋá juo káfestallanáigi. SámiSostera bargiguovttos Inger-Ánne Äärelä ja Kaija Länsman stellesteaba beavddi gárvvisin vai ii darbbaš go njoamihit beavdái. Aili Koskinen lea movtta go beasai vuolgit.

– Moson mun dajašin. Oaidnit eará oahpes olbmuid ja várrahan dat leat go Kaija luhtte go fitná de doppe oažžu boraditge. Dat leat midjiide ollu go ieš lean láiki ráhkadit borramuša dán áigái, bohkosa Koskinen.

Borramuša lassin gáffebeavddis lea buorre muittašit ja hállat doložii. Anárlaš Uuno Angeli ii lean goassige ovdal fitnan Lismmás. Dál son beassá deaivvadit guovllu bajoniiguin ja masba earás sahka go bohccuin. Leahan Lismá boares boazogilli.

– Dat lei nu amas guovlu mun fertejin dál go lea eallinahki de fertejin fitnat geahččamin dánge guovllu, muitala Angeli.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä