Sápmi |

Anára gielda juohkigođii liigeborramušaid olbmuide – geahččaleapmi bistá gitta juovllaid rádjai

Go Anár gieldda guovddášgievkkanis Avvilis málestit stuorra kástarullaiguin, máŋgii lea váttis árvvoštallat, man ollu borramuš guđege beaivvi justa dárbbašuvvo.

Anette Leppäkangas ja Marika Liimatainan Inarin kunta.
Anára gieldda sosiálabarggu láidesteaddji Anette Leppäkangas ja borramušfuolahushoavda Marika Liimatainen leaba gearggusin guksenađas gitta, go olbmot bohtet viežžat nuvttá borramuša gieldda ođđa bálvalančuoggás Avvilis. Govva: Kaisa Aikio / Yle

Anár gieldda guovddášgievkkanis Avvilis málestit hávil lagabui duhát olbmui. Borramušat vulget gievkkanis earret eará Avvila márkana skuvllaide ja daidda, geat gullet gieldda borramušbalvalussii.

Biillat juohkigohtet borramušaid miehtá márkana juo áiggil iđitbeaivvi áigge. Juohke beaivvi leage mealgat hušša borramušaiguin, go dárbbašeaddjit maid galget daid áiggil oažžut.

Máŋgga čuohte lihttera buđetkástarullas soaitá goit ain báhcit juoidá badjelge. Dál go máilmmis lea ekologalaš jurddašanvuohki ja muđuige lea njuolga suddu bálkestit borramuša, gielda geahččaladdá dál liigeborramuša juohkima olbmuide.

Juohkimat máŋgii vahkus

Vuosttas borramušjuohkin leai maŋŋebárgga čakčamánu vuosttaš beaivvi. Juohkin dáhpáhuvvá čujuhusas Petsamontie 9. Uvssat rahpaset diibmu 12.15 ja juohkin bistá ovtta rádjai.

Ulbmilin lea, ahte borramuša dárbbašeaddjiin lea iežas lihtti fárus, masa oažžu liegga borramuša ja dan lassin saláhta. Borramuša mearri goittot molsašuddá beivviid mielde, ja gielddas muittuhit, ahte juohke beaivvi borramuš ii reahkkáge juohkimii dahje dat sáhttá nohkat maid gaskan.

Čakčaluomu áigge 12.–16.10. dát gieldda bálvalančuokkis lea gitta. Muđui juohkin lea juohke árgabeaivvi.

Dál álggos dát juohkindoaibma lea geahččaleapmi, mii bistá juovlamánu 18. beaivvi rádjái. Juohkimis čuvvot nu Borramušlágádus Evira go maid Dearvvašvuođa- ja buresveadjinlágádus THL mearrádusaid, dál go koronaáigi lea bárisin mannamin.

Marika Liimatainen ja Kerttu Kangasniemi Ivalo.
Anára gieldda borramušfuolahushoavda Marika Liimatainen veahkeha njálbmesuoji avvillaš Kerttu Kangasniemi ámadadjui. Son leai okta daid vuosttamuččain, guhte bođii viežžat nuvttá borramuša. Dá leaba vel juohkinbáikki olggobealde, muhto siskkobealde buohkain galget leat oaivvis suojit, go leahan jearaldat borramušain. Govva: Kaisa Aikio / Yle

Buohkat leat duhtavaččat

Mannan maŋŋebárgga báikki alde fitne sullii 15 olbmo, go Anára gieldda geahččaleapmi liigeborramušaid juohkimis álggii. Anára gieldda borramušfuolahushoavda Marika Liimatainen mielas lea buorre, ahte borramuša ii dárbbaš bálkestit.

– Dát mearkkaša duohta olu. Leamašan váivi borramuša bidjat luniide boradeami maŋŋá. Dál addojuvvon rávvagiid mielde liegga borramušat doaimmahuvvojit juohkimii liekkasnaga ja galbma borramušat galmmasnaga, ja dán láhkái mii beassat daid juohkit ovddusgovlui, muitala Liimatainen.

Gielda lea lágideamen Avvila márkanii boares giddodahkii bálvalančuoggá, masa borramuša juohkima lassin leat boahtimin máŋggat earáge doaimmat. Giddodaga ordnenbarggut leat áiddo dál jođus, ja dat galget gárvvásmuvvat farggabáliid. Dálu namman šaddá Ainola.

Gieldda sosiálabarggu láidesteaddji Anette Leppäkangas vuordá, ahte gili olbmot gávdnet sin. Vuosttaš juohkin goit geasuhii olbmuid, muhto eamboge livčče vel čáhkan, dadjá Leppäkangas.

– Mii leat ožžon liigeborramušaid juohkimis jo ovddalgihtii olu positiivvalaš máhcahaga. Máŋggaid mielas dát lea hui buorre ášši, dadjá Leppäkangas.

Kerttu Kangasniemi Avvil.
Avvillaš Kerttu Kangasniemi leai ráhkkanan gieldda borramušjuohkimii iežas lihtiiguin nu mo galggaige. Su mielas borramuša bálkesteapmi lea njuolga suddu. Govva: Kaisa Aikio / Yle

Vuosttas juohkimis olbmot ožžo guollebulláid, njuvdojuvvon buđehiid ja dasa heivejeaddji saláhta. Avvillaš Kerttu Kangasniemi leai okta daid vuosttamuččaid siste, guhte bođii viežžat nuvttá borramuša. Su mielas borramuša galgá gudnejahttit, vaikke dat soaitáge oidnot gokko nu.

– Borramuša ii mange namas oaččo bálkestit. Mu mánát dadjet, ahte gal dan muhtumin sáhttá, juos juoidá báhcá. Mun fas dajan sidjiide, ahte ovdal mun boran dan go bálkestan. Mánáid mielas dat goit sáhttá oidnot mus, dat bures boradeapmi, čaimmiha avvillaš Kerttu Kangasniemi.

Varrasamosat: Sápmi

Váldoođđasat

Varrasamosat

Muualla Yle.fi:ssä