Sápmi

Anára gieldda badjel 220 lássagoađi leat guorusin, go olgoriikalaš turisttat eai šat jođe

Northen Lights Village
Anára gielddas leat badjelaš 200 lássagoađi. Govva: Vesa Toppari / Yle

Yle jearahallan suopmelaš turisttat livčče gárvá máksit vehá eambo lássagoađis idjadeamis go dábálaš hoteallas.

Ovdal dán muttus jagis lea Anár gielda leamaš jo goasii spágga dievva, go olgoriikalaš turisttat leat boahtán davás oaidnindihte guovssahasaid.

Dáid turisttaid várás leat huksen lássagođiid, mat sulastahttet igluid, vai turisttat besset iežaset seaŋggas geahčadit guovssahaid. Anára gielddas leat sullii 220 lássagoađi, muhto dál dat leat buot guorusin.

Fitnodatdoalli Markku Inkilä galggai dán dálvái huksehit ođđa lássagođiid ja maiddái eará láigovisttiid sihke Anára gieldda guovllus ja maiddái Gihttela Levii, muhto dál lea gártan gaskkalduhttit dáid plánaid. Sáhka lea sullii 10 miljon euro investeremis. Inkilä sávvá, ahte beassá joatkit plánaiguin, go de koronapandemiija ložže.

Markku Inkilä
Markku Inkilä gárttai šluhttet 10 miljon euro investeremiid. Govva: Vesa Toppari / Yle

Markku Inkilä mielde sis ii livčče várri doallat lássagođiid guorusin, muhto lohká su fitnodaga sihkkarit ceavzit dálá dilis jagi 2021 lohppii.

– Ferte ieš oađđit juohke goađis vai bissot liekkasin, lohká Inkilä.

Hoteallaeaiggádat geahččalit márkanastit lássagođiid maiddái ruovtturiikka turistaide

Dálá máilmmi dilis Suomas leat olu ávžžuhan olbmuid mátkkoštit ruovtturiikkas vai báikkálaš fitnodagat eai koŋkánivčče. Hoteallaeaiggát Jouko Lappalainen muitala, ahte sii leat kampánjeren dál maid olu Suomas. Su mielde suopmelaš ja olgoriikalaš turisttain eai leat nu olu erohusat, earret mátkeprogámma ektui.

– Olgoriikkalaš turisttaide vuovdit olles pakeahta, suopmelaččaide eambo dušše idjadeami. Suopmelaččat eai oastte prográmmabálvalusaid seamma olu.

– Mii leat maiddái vuovdán dál veháš vuoliduvvon haddái suopmelaččaide dán čavčča, muitala Lappalainen.

Jouko Lappalainen
Jouko Lappalainen jurddaša positiivalaččat boahttevuođas. Govva: Vesa Toppari / Yle

Jouko Lappalainen mielas dilli lea hui eahpečielggas dál ja sii vurdet stáhta mearrádusaid mátkkoštanráddjehusain. Lappalainen lea leamašan mielde hápmemin nu gohčoduvvon dorvvolaš mátkkoštankonseaptta, ja son sávášiige, ahte dainna sáhtášedje ávkkástallat.

– Dat livččii buoremus vuohki dál ovddidit dán ášši.

Jouko Lappalainen lea goittotge optimista boahttevuođa ektui. Son árvala, ahte vaikko koronadilli ii manašii vuos buoret guvlui, de liikká dainna oahpašedje eallit ja bargat.

Gallup: guovssahasat geasuhit turisttaid Mátta-Suomas

Yle jearahalai Suoločielggis suopmelaš turisttain, maid sii oaivvildit luomus davvin ja leatgo sii gergosat máksit veháš eanet lássagoađis idjameamis.

Joona Timperi lea eret Kouvolas ja son lea boahtán dál lupmui davás. Son livčče gárvvis máksit vehá eambo lássagoađis idjadeamis.

– Galhan livčče miellagiddevaš, Mátta-Suoma olbmui lea vásáhus jus beassá oaidnit guovssahasaid, muitala son.

Joona Timperi
Joona Timperi sáhtášii máksit eambo lássagoađis idjadeamis. Govva: Vesa Toppari / Yle

Saija Rants lea boahtán Raahes návddašit čakčadálvvis. Son maid áinnas háliidivččii idjadit lássagoađis.

– Namalassii dat guovssahasat leat dat, maid háliida oaidnit. In dieđe bállešiigo das oađđit, go ferte fáktet almmi.

Sari Lajunen Nokias eret maid háliidivččii idjadit lássagoađis. Son lea maid dan oaivilis, ahte sáhtášii dakkár erenomáš idjadeamis máksit veháš eambo, go dábálaš hoteallas.

Sari Lajunen
Suoločielgi lea oahpes báiki Sari Lajunenii. Govva: Vesa Toppari / Yle

– Suoločielgi ii leat munnje ođđa báiki, lean fitnan dáppe máŋgii ovdalge. Dát biras ja luondu dáppe geasuhit.

Kirsi Leppälä livčče gárvvis máksit sullii 200 euro ovtta ijas lássagoađis.

– Dat gal baicca livččii albma vásáhus, go beassá oađđit guovssahasaid vuolde.

Varrasamosat

Muualla Yle.fi:ssä