Sápmi |

Anára girkosiidda johtolaga áiggošedje buoridit váile miljon euro fidnuin – Gielda ja EJB-guovddáš áigot ohcat fidnui EU-ruđa

Anára girkosiidii plánejit ođđa johtolagaid, asfáltta, luoddaearuid ja hihtudeddjiid – Anár gielda ja EJB-guovddáš ohcet fidnui vádjit miljovnna euro ruhtadeami.

Govva Anára girkosiidda johtolaga buoridanplánas.
Ovdamearka Anára girkosiidda johtolaga buoridanplánas. Govva: Lapin ELY-keskus

EJB-guovddáža evttohusa mielde fidnui ohccojuvvo 50 proseantta ruhtadeapmi Eurohpá guovloovddidanfoandda EAKR:s. Anár gielda ja EJB-guovddáš mávssašedje nuppi beali ovttas nu, ahte Anár gieldda oasus livččii 25 proseantta.

Fidnu ovddideapmi lea vuolgán johtui dainna, ahte Lappi ealáhus-, johtolat- ja birasguovddáš lea barggahan huksenplána váldogeainnu 4 buorideapmái. Huksenplána lea dahkkon Čuárvinjaargâ ja Uáđđivei geaidnoluottaid gaskii, nappo gili davágeažis Sámemusea Siidda buohta sullii vihta kilomehtera máttás Avvil guvlui.

Stuorra buorideamit johtolahkii

EU-prošeavttain áiggošedje organiseret Anára márkana máttabealde Uáđđivei ođđa turismaguovllu johtolaga, hukset gili guovddážii johtolathihtudeaddji Siulageainnu buohta ja buoridit márkanguovddáža geaidnobirrasa muđuige.

– Plána sisttisdoallá johtolathihtudeaddji Menešjávrri geaidnoerrui, ja vázzingeainnu Menešjávrrigeainnu ja Juvdujoga gaskii. Maiddái gili davágeahčai Čuárvinjaargâ geaidnoerrui plánejit nuppástusaid dego johtolaga hihtudeaddji. Hihtudeaddji galgá njoahcudit johtolaga, mii boahtá davvin márkanguvlui, lohká Anár gielddaráđđehusa dieđáhusas.

Fidnu olis Anára márkanii áigot maid bidjat ođđa asfáltta olles viđa kilomehtera mátkkis, divvut vázzingeainnuid ja organiseret daid ođđasit. Dasa lassin fidnu plánas lea maid johtolatčuovggaid ođasmahttin ja ássanviesuid luoddaearuid divvun.

Dán seamma oktavuođas Inarin Lapin Vesi Oy áiggošii saneret čáhce- ja duolvačáhcebohccefierpmádaga, mii lea váldogeainnu vuolde.

Vádjit miljon euro fidnu – Gieldda oassi  livččii 25 proseantta

– Fidnu bušeahttan lea oktiibuot 921 000 euro, buktá Lappi EJB-guovddáš ovdán plánastis.

EJB-guovddáža evttohusa mielde fidnui ohccojuvvo ovttas ruhtadeapmi Eurohpa guovloovddidanfoandda EAKR:s. Ruhtaohcama lassin EJB-guovddáš lea evttohan, ahte Anár gielda ja EJB-guovddáš vástideaba ovttas dain goluin, mat mannet badjel fidnu bušeahta. Vejolaš lassemearreruhta goittotge gieđahallojuvvo maŋŋelis sierra.

EJB-guovddáš evttoha, ahte fidnu ollašuhttojuvvošii jagis 2018, juos ruhtadeapmi ollašuvvá.

Anára gielddaráđđehus mearridii 4.9. dohkkehit EJB-guovddáža evttohusa gieldda oassálastimis fidnui dainna eavttuin, ahte váldostivra várre dasa mearreruđa.

Váldostivra gieđahallá fidnui oassálastima maŋŋebárgga 26.9.2017.

Čuárvinjaargâ geaidnoearru
Anára girkosiidda johtolatplána mielde Čuárvinjaargâ geaidnoerrui huksejuvvojit johtolathihtudeaddjit. Govva: Lapin ELY-keskus
Anára girkosiidda johtolatplána Siiddas Menešjávrri geaidnoerrui
Anára girkosiidda johtolaga buoridanplána mielde ovdamearkka dihte Menešjávrri geaidnoearu ja Juvdujoga gaskii, Sámekulturguovddáš Sajosa báldii, huksejuvvo vázzingeaidnu. Govva: Lapin ELY-keskus
Menesjávrri geaidnoearru Anára girkosiidda johtolatplánas
Anára girkosiidda johtolatplána mielde gili guovddaža geaidnolavttat buoriduvvojit ja Menesjávrri geaidnoerrui huksejuvvo johtolathihtudeaddji. Govva: Lapin ELY-keskus
Siulageaidnu Anára girkosiidda johtolatplánas
Plána mielde maiddái Siulageainnu geaidnoerrui huksejuvvojit johtolathihtudeaddjit. Govva: Lapin ELY-keskus

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä