Sápmi |

Anára girkosiidii ceagganit ođđa hoteallat – ovdáneami oidnet buorrin, muhto muhtimat ballet liigehuksemis

Anára márkanis leat juo dál birrasii duhát idjadansaji, go ássit leat badjelaš 600.

Inarin Wilderness-hotelli
Anára Wilderness-hotealla lea huksen ođđa bárradáluid mátkkálaččaid várás. Govva: Vesa Toppari / Yle

Suomas Anára girkosiiddas gárvána hotealla olles fártta ja ođđa lávggodanhotealla fas plánejit Juvdujoga gáddái.

Anára girkosiida lea šaddamin ain eanet turistaguovddážin, go gillái šaddet ođđa idjadansajit. Anára márkanis leat juo dál birrasii duhát idjadansaji, go ássit leat badjelaš 600.

Báikkálaš fitnodatdoalli Kaisu Nikula oaidná ášši buorrin, muhto ballá liigehuksemis.

– Mun jáhkán, ahte boahttevuođas lea buohkaide buorre ášši, go huksejit. Mun dušše doaivvun, ahte dat hoteallat, mat deikke bohtet, eai livčče hirbmat stuorrá.

Anára gieldda ealáhushoavdda sadjásaš Marja Männistö lea dan mielas, ahte dáppe lea sadji ođđa fidnuide, mat buktet ođđalágan bálvalusaid turisttaide.

– Anárii gal čáhket ođđa hoteallat, go beare buot eai leat seammaláganat. Smávva hoteallat, main leat iešguđetlágan bálvalusat, leat dán áigge mátkkálaččaid miela mielde, muittuha Männistö.

Marja Männistö, elinkeinojohtajan sijainen, Inarin kunta
Anára gieldda ealáhushoavdda sadjásaš Marja Männistö oaivvilda, ahte Anáris lea sadji ođđa fidnuide. Govva: Anneli Lappalainen / Yle

Son joatká, ahte fitnodatdoaimma dáfus lea hui buorre, ahte deike huksejuvvo ja šaddet iešguđetlágan fálaldagat. Sosiálalaš suvdilvuođa dáfus leat juo boahtán kommeanttat, ahte huksemat sáhttet leat liiggás.

Mátkkálaččaid Anárii geasuhit guovssahasat ja luondu. Maiddái Laura Lam Hong Kongis eret lea boahtán Anárii dálá ruovtturiikkastis Duiskkas geahččat guovssahasaid ja luonddu.

– Dat leat nu bivnnut Suomas. Dán vuoro in oaidnán daid. Sávvamis čuovvovaš beivviid áigge lea vejolaš vásihit dange. Anáris buoremus ášši leat ustitlaš olbmot, ja eallin lea dáppe hui ráfálaš.

Matkailija Laura Lam Inarissa.
Laura Lam mátkkoštii Anárii geahččat guovssahasaid. Govva: Anneli Lappalainen / Yle

Reiko Japanis lea maid boahtán Anárii geahččat guovssahasaid ja vuoiŋŋastit. Son guorrasa Lam jurdagiidda.

– Anáris buoremus lea luondu, beaivvi čuovga ja ustitlaš olbmot.

Geahča lasi dán áššis Yle Ođđasat sáddagis Yle TV1:žis diibmu 16.45 ja dan maŋŋá Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä