Sápmi |

Anára hoteallat eai dieđe, leatgo koronavirusnjoammumis navdojuvvon turisttat idjadan sin luhtte – lasihit desinfiserenávdnasiid ja lanjaid čorgema

Hoteallaeaiggádat váldet duođas dávdaeahpádusa ja čuvvot dárkilit dili ovdáneami.

Kultahovi
Riikkaidgaskasaš turisma lea dákkár, iige dávddain dieđe, dadjá Kultahovi hoteallaeaiggát Kaisu Nikula. Son muittuha, ahte Avvila dáhpáhusas dávda ii leat nannejuvvon, baicce easkka navdojuvvon. Govva: Vesa Toppari / Yle

Anára hoteallat eai dieđe, leabago koronavirusnjoammumis navdojuvvon kiinnálaš turisttaguoktá idjadan sin luhtte. Guokte Wuhanis boahtán kiinnálačča ohcaleigga dikšui mannan ija Avvila dearvvasvuođaguovddážii Anára gielddas. Áššis sáhttá lohkat eanet dán beaiváduvvi artihkkalis.

Anára ja Suoločielggi hoteallain leat goit seammás darvánan áššái. Gieđaid desinfiserenávdnasiid leat buktán valjis juohke sadjái, ja gieđaid bassamis maiddái muittuhit.

Anára Kultahovi hoteallaeaiggát Kaisu Nikula muitala, ahte sii áigot maiddái čorget lanjaid earenomáš bures dán dávdaeahpádusa dihte.

Kultahovis eai leat dáid beivviid go moattit kiinnálaččat guossin, go Skábmagovat-filbmafestivála guossit lea deavdán sin lanjaid.

Dávdaepidemiijat sáhttet hehttet turismma, jáhkká Nikula. Dávddaid njoammumis ii goassige dieđe.

– Visot dákkárat leat áitagat ja buktet eahpersihkkarvuođa turismaealáhussii. Globála dávdaepidemiija sáhttá njoammut gos beare. Jus ovdamearkka dihte lea vaikkoba duiskalaš guossi, guhte lea fitnan gieskat Kiinnás bargomátkkis, de diená gii beare sáhttá leat dávdaguoddi, čilge Nikula.

"Dákkáriid ferte váldit duođas"

Hotelli Inari hoteallaeaiggát Tapani Lappalainen lea olgoriikkain luomus ja čuovvu dárkilit ođđasiid navdojuvvon koronavirusnjoammuma birra.

Sin hoteallas leat maid lebben giehtadesinfiserenávdnasiid.

– In dieđe justa galle kiinnálačča leat guossin dál. Dál goit min guossit leat eanaš filbmafestiválaguossit. In mun bala, muhto dákkáriid ferte áli váldit duođas ja čuovvut mo dilli ovdána, muitala Lappalainen.

Moadde guossi jearran dili birra

Suoločielggis Santa's Hotel Tunturi jođiheaddji Eeva-Marja Jokinen muitala, ahte sii čuvvot dárkilit, mii dáhpáhuvvá.

– Moadde guossi leat jearahan bargiin dán dili birra. Mii čuovvut dan ja mis lea čavda ovttasbargu riikkaidgaskasaš mátkeordnejeaddjiiguin, muitala Jokinen.

Sámemusea Siiddas Anáris fitnet olu olgoriikkalaš guossit. Sin gussiin kiinnálaččat leat vihtta proseantta. Musea ii goit kommentere ášši, dasgo dieđiheami dikšot Anára gielda ja Visit Finland.

Avvilis buohccán kiinnálašguoktás leat váldán čájánasaid ja dat leat sáddejuvvon Helssegii dutkanláhkai. Bohtosat leat vuordimis eahkedis.

Varrasamosat: Sápmi

Váldoođđasat

Varrasamosat

Muualla Yle.fi:ssä