Koe uusi yle.fi
Sápmi |

Anára hoteallat fállagoahtan visttiid bargiidasaset – Muđui eai oaččo bargiid

Hoteallat leat álgán hukset orrunsajiid bargiidasaset, go Anára márkanis illá gávdnojit viesut bargiide.

Aleksi Mattanen bargá dál Anáris go son háliidii davás.
Aleksi Mattanen oahpásmuvvamin, makkár vistái son beassa fárret.

Davvi-Supmii vurdet boahtte dálvvi eanet turisttaid go ovdal. Nuba maid sesoŋŋabargit dárbbašuvvojit oalle ollu.

Bargiid oažžuma lea hehtten Anára márkana heajos viessodilli. Danin máŋggat hoteallaeaiggádat leatge mearridan hukset ieža bargiidasaset orrunsajiid.

– Dat gáibida investeremiid ja návccaid, muhto dat lea sihkkarit dákkár investeren, mii ii mávsse njuolga ruđain iežas ruovttoluotta, muhto baicce máksá iežas dainna, go mii fidnet buriid bargiid, lohká Anára Hotel Kultahovi nubbi oamasteaddji Heikki Nikula.

Heikki Nikula

Buriid sesoŋŋabargiid lea muđuige váttis gávdnat, oaivvilda Heikki Nikula.

– Mis lea dálge fállat bargiide visttit, dat lea krihtalaš ášši dieđusge. Muhto álohan dat lea hástaleaddji go lea jearaldat sesoŋŋabáikkiin, ahte gávdná buriid bargiid. Sii leat seamma divrasat go golli.

Vistti váikkuha, váldetgo barggu vuostá

Aleksi Mattanen Soađegilis lea bargan juo guhkká sesoŋŋabargin miehtá Suoma. Dán háve son gávnnai barggu Anáris, ja oaččui maiddái iežas vistti.

Iežas vistti oažžun váikkuhiige su mearrádussii boahtit Hotel Kultahovii bargui.

Aleksi Mattanen ja Heikki Nikula.
Aleksi Mattanen vuosttas bargobeaivi Anáris álggii bargobirrasii oahpásmuvvamiin. Son lea hálešteamen Heikki Nikulain ođđa barggu birra.

– Máŋggain báikkiin leat dákkár visttit, main orrot máŋgasat ovttas, dat ii leat nu buorre molssaeaktu. Dáppe goittotge lea dákkár iežas vistti, galhan dat váikkuhii mu mearrádussii go lea de iežas ráffi, muitala Mattanen.

Son loaktá davvin ja lea ilus das, ahte beasai boahtit Anárii bargui. Aleksi Mattanen lea bargan Suoločielggis máŋga jagi ovdal go fárrii davvelii.

– Galhan dat álo lea suohttasut leat davvin go leat oahpes guovllut ja luondu láhka. Máddin ii beasa guolástit ja meahcástitge nu álkit.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä