Sápmi |

Anára Kultahovi restoráŋŋa "Aanaar" lea válljejuvvon jagi restoráŋŋan – oktage eará lappilaš restoráŋŋa ii leat ožžon dán bálkkašumi

Dát lea jáhkkemeahttun, govvida dovdduidis gievkkanmeašttir Heikki Nikula.

Keittiömestari Heikki Nikula
Bálkkašupmi addá movtta ja roahkkatvuođa smiehttat ja ođasmahttit Aanaar-restoráŋŋa borramušlisttu, dadjá gievkkanmeašttir Heikki Nikula. Govva: Vesa Toppari / Yle

Suoma Gastronomaid searvi lea válljen anárlaš Aanaar-restoráŋŋa Suoma jagi restoráŋŋan.

Aanaar-restoráŋŋa Kultahovi-hoteallas lea beaggán olu ovdalge. Dan goahkka ja gievkkanmeašttir Heikki Nikula lea šaddan jo beanta beakkálmassan Suomas, go son lea ovdamearkka dihte málestan Loirinuotiolla-prográmmas.

Nikula ii meidne jáhkkit ođđasiid bálkkašumi birra.

– Lea jáhkkemeahttun oažžut dákkár bálkkašumi Anárii. Dát lea issoras fiinna dovdu.

– Ovdal dát bálkkašumit leat mannan beare stuorra gávpogiidda, dego Helssegii, Tamperei ja Turkui, illuda Aanaar-restoráŋŋa gievkkanmeašttir Heikki Nikula.

Suoma Gastronomaid searvi rámiida Aanaara biepmuid, go daid háhkan álgá šiljus ja ollá gitta Jiekŋamerrii.

– Restoráŋŋa borramušfálaldagas eai leat biepmut, maid fállet juohke davi restoráŋŋas, dego mat biđus, Suoma Gastronomaid searvi ákkastallá.

Bálkkašupmi addá ođđa movtta bargui ja menu ođasmahttimii

Gievkkanmeašttir Heikki Nikula lea ovddidan borramušaid, maid vuođđun leat sámi árbevirolaš mállásat.

Nikula málesta nu varas čuovžžas go bohccovaras, man dábálaččat eai geavat nu olu, ákkastallet Suoma Gastronomaid searvvis válljejumi.

– Restoráŋŋa biebmoávdnasat bohtet mehciin, jekkiin, johkalegiin, Anárjávrris ja Jiekŋamearas, dat leat min restoráŋŋa vuođđun, muitala Heikki Nikula.

Bálkkašupmi addá ođđa movtta Nikula bargui.

– Mii smiehttat dávjá, mo ođasmahttit ja ovddidat min borramušlisttu. Dát bálkkašupmi addá roahkkatvuođa joatkit seamma linnjáin. Eat sihkkarit álgge pizza dahje kebaba vuovdit, bohkosa Nikula.

Suoma Gastronomaid searvi lea geigen Jagi restoráŋŋa -bálkkašumi jagi 1985 rájes. Ovdal bálkkašumi lea ožžon ovdamearkka dihte restoráŋŋa Savoy.

Oktage lappilaš restoráŋŋa ii leat ovdal ožžon dán dovddastusa.

Varrasamosat: Sápmi

Váldoođđasat

Varrasamosat

Muualla Yle.fi:ssä