Sápmi |

Anára njealjebeaivásaš Sápmi Pride lahkona – Prográmma almmustuvvan

Dáhpáhus doallá sisttis earret eará bargobájiid, ráidovázzima ja ealligova. Dehálamos goittotge lea beassat leat ovttas, oaivvilda ordnejeaddji Anne Olli.

Anne Olli
Sápmi Pride ordnejeaddji Anne Olli vuordá iluin Anára dáhpáhusa. Govva: Martta Alajärvi / Yle

Dán jagáš Sápmi Pride -dáhpáhusa prográmma lea almmustahttojuvvon.

Sápmi Pride ordnejuvvo Anáris boahtte vahkus, borgemánu 17.–20. beivviid. Dát lea buot áiggiid njealját Sápmi Pride -dáhpáhus, muhto ordnejuvvo dál vuosttas geardde Suoma beale Sámis.

Njealjibeaivásaš dáhpáhus doallá sisttis earret eará bargobájiid, ráidovázzima ja ealligova čájeheami. Dehálamos goittotge lea beassat leat ovttas, oaivvilda ordnejeaddji Anne Olli.

– Mis lea ulbmilin, ahte olbmot livčče ovttas, ságastallet ja oahpásmuvvet nuppiidasaset. Mis lea prográmmas olu ovttasleahkin, Olli muitala.

Arvedávggi ivnnit báitet Anára márkanis

Sápmi Pride álgá duorastaga 17.8. bargobájiin, mii gieđahallá LGBTQ-sámiid rivttiid ja sajáiduvvama. Bargobáji doallá Árktalaš guovddáža dutki Laura Olsen.

Bearjadaga 18.8. dáhpáhus rahppojuvvo virggálaččat ja oassálastit besset báidnit liidneseahkaid ja duddjot šilttaid ráidovázzima váras.

– Doppe sáhttá buđaldit maiddái juoidá earáge, jos háliida. Livčče somá, jos olbmot málešedje ovdamearkka dihte bohccočorvviid árvedávggi ivnniiguin, Anne Olli smiehtada.

Ellos Deatnu
Govva: Ville-Riiko Fofonoff / Yle

Lávvardaga váldodáhpáhus lea ráidovázzin Anára gili čađa. Ráidovázzin álgá diibmu 14.15.

– Mii vuolgit Siidda birrasis šalddi davábealde ja vázzit gili čađa gitta dearpmi ala gáddái. Ráidovázzin lea sihkkarit dakkár, mii oidno ja man mun vuorddán olu. Oaidnitleš man olu olbmot bohtet ja man guhki ráiddus šaddá.

Lávvardateahkes Sunná Valkeapää doallá dánsalihkastatterapiija gieđahalli bargobáji.

Sápmi Pride nohká sotnabeaivve Suvi West bagadallan Sparroabbán-filmma čájeheapmái Siidda auditoriijas.

– Sihkkarit buohkat eai leat vel oaidnán dán flmma, de lea dehálaš čájehit dan. Dokumeantta ja dan maŋŋá ságastallama várás lea várrejuvvon oktiibuot guokte diimmu, Anne Olli muitala.

Kaisa West, Sparrooabbán
Spárrooabbán-filbma muitala Kaisa West birra. Govva: Sparrooabbán

Sápmi Pride dieđiha vel maŋŋelabbos lávvardaga eahketdoaluid birra. Eanet dieđuid gávdná dáhpáhusa Facebook-siiddus.

Divvojuvvon 9.8.2017 diibmu 14:46: Spárrooabbán-filmma ja ságastallamii várrejuvvon áigi.

Varrasamosat: Sápmi

Váldoođđasat

Varrasamosat

Muualla Yle.fi:ssä