Sápmi |

Anára sámeluohkká vázzá dál skuvlla olgun – oahpaheaddji rábmo: "Dehálaš doarjut ja nannet luondduoktavuođa"

Sisáibmováttisvuođaid dihte Anáris leat hutkan ođđa vugiid golahit skuvlabeaivvi: dál sámeluohkkálaččat besset eanet lundui.

Video: Inarin koulun saamenluokat kävelevät yhdessä uusiin koulutiloihin joka päivä tänä keväänä.
Anára skuvla sámeluohkkálaččat vázzet dán giđa juohke beaive sádjasaš skuvlalánjaide. Luonddus skuvlabiras lea earálágan ja oahpaheaddjit leat beassan hutkat ođđa vugiid oahpuide. Govven ja čuohppan: Kirsti Länsman. Video: Yle Sápmi
Anár

Sámeluohká mánát gazzet oahpu olgun Anára skuvlla sisáibmováttisvuođaid dihte. Anáris eai leat olu gaskaboddosaš sajit skuvlavázzimii, ja danin sámeluohkká lea mearridan leat olgun.

Oahpaheaddjiguoktá rábmoba, mo sámemánát besset dál eanet oahppat luonddu siste.

– Go mii leat olgun, leat beassan dutkat olu elliid luottaid. Iđđes leat beassan geahččat makkár dálki lea ja leat duođaige beassan oahppat ja geahččat sierralágan muohtasániid. Dat lea eará olgun geahččat go lássaráigge guovlat, ahte muohttágo vai borgágo, dadjá oahpaheaddji Margareetta Suoninen.

– Luondduoktavuođa nannen ja doarjun lea dehálaš mánáide, joatká oahpaheaddji Siiri Magga.

Inarin koulun saamenluokan opettajat Margareetta Suoninen ja Siiri Magga.
Oahpaheaddjit Margareetta Suoninen ja Siiri Magga leaba beassan hutkat ođđa vugiid, mo oahpahit mánáid olgoskuvllas. Govva: Sara Wesslin / Yle

Oassi skuvlamánáin joatká boares skuvllas, oassi gaskaboddosaš sajiin

Anára girkosiiddas leat juo guhká gillán skuvlavistti heajos sisáimmu dihte. Dál Anára skuvlalaččaide leat gávdnon gaskaboddosaš sajit skuvlavázzimii gilis.

Inarin koulun saamenluokat opiskelevat nyt väistötiloissa
Anára skuvla sámeluohkát leat juo moadde beaivvi golahan oahppodiimmuid gaskaboddosaččat Sámemusea Siidda šiljus. Govva: Sara Wesslin / Yle

Anára skuvlla rektor Marja Seilonen muitala, ahte oassi skuvlalaččain ain joatká skuvlavisttis.

Anáris oassi ohppiin stuđere Sámemusea Siidda gámmes ja maiddái sámekulturguovddáš Sajosa čoahkkinlanjain.

Saamenkielen luokat opiskelevat Saamelaismuseo Siidan kammissa.
Oahpahusa ordnejit maiddái Siidda gámmes, gos oahppit sáhttet dahkat hárjehusaid. Dál maiddái dolastallan gullá sin skuvlabeivviide. Govva: Sara Wesslin / Yle

Okta čoavddus lea maiddái leamašan golahit skuvlabeaivvi eanet olgun. Sámeluohká olgooahpahusa lassin sámemusea šilju gámme lea maid gaskaboddosaš skuvlaluohkká. Dáppe sii besset ráfis lohkat girjjiid ja dahkat hárjehusaid, muhto hivssegis ja boradeamen ferte fitnat vel gos nu eará sajis.

Liikká sii liikojit dálá čovdosii ja olgoskuvlii.

– Dat addá olu vejolašvuođaid mu mielas. Gal nugo matematihka sáhttá bargat olgun. Ja eatnigiela dieđus maiddái ja ferte vel earáláhkái smiehttat, mo oahpahit mánáide čállima ja lohkama, muhto buot eará sáhttá gal olgun bargat ja oahpahit, smiehtada Siiri Magga.

Elle-Matilda Näkkäläjärvi opiskelee.
Nubbi luohkkálaš Elle-Matilda Näkkäläjärvi liiko eatnigiela diimmuide. Govva: Sara Wesslin / Yle

"Somá, go oažžu leat olgun doppe stoahkangiettis"

Sámemusea šillju ja stoahkanbáiki leatge sihke ovdaskuvlla ohppiid ja vuosttas ja nubbi luohká ohppiid stohkosiin stuorra rollas.

Oahpaheaddji Margareetta Suoninen illuda, mo čavga áigetávvalat eai rádje olu skuvladoaimmaid ja gaskadiimmuid lassin mánáiguin johtet eanet luonddus.

Biret Lipponen ja Elle-Matilda Näkkäläjärvi viehkaba čierastallat dalán, go luohkká joavdá ođđa skuvlabirrasii.

– Dáppe lea somá, go oažžu leat olgun doppe stoahkangiettis, dadjá Elle-Matilda Näkkäläjärvi.

Vázzin ii leat goit álot nu mánáid miela mielde.

– Goas nu lea vehá láittas vázzit deike. Dego otne, go lei ikte muohttán hui olu, de lei vehá váttis vázzit, oaivvilda Näkkäläjärvi.

Olgun lea mánáid mielas olu suohttasut, go dábálaš skuvlaluohkás.

Elle-Matilda Näkkäläjärvi ja Biret Lipponen.
Elle-Matilda Näkkäläjärvi ja Biret Lipponen liikoba, go olgun sáhttá ain eanet golahit áiggi skuvlabeivviin. Govva: Sara Wesslin / Yle

– Lea somá, ja somá stoahkat ja somá go nuppiiguin lea somá, smiehtada Mubemihkal Juntunen.

Dán giđa sii áigot vázzit skuvlla dáinna lágiin. Anára gielda lea bargagoahtán dan ovdii, ahte gillái fidnešedje ođđa skuvlavistti.

Bohtos ođđa skuvlavisti dahje ii, de oahpaheaddjit leat áinnas movtta joatkit oahpahusa olgoskuvllas.

– Mun lean gal nu ilus. Dás boahtá eanet mokta olgun bargat. Ferten gal dovddastit, ahte ovdal ii leat leamaš ná olu olgun ja smiehtan dál, ahte manin ii leat leamašan. Dat addá nu olu buotlágan vejolašvuođaid, nu mun gal áiggun joatkit dán sihkkarit, jurddaša Siiri Magga.

Varrasamosat: Sápmi

Váldoođđasat

Varrasamosat

Muualla Yle.fi:ssä