Sápmi |

Anára skuvlalaččaid vánhemat eai leat doapman váldit mánáideaset eret skuvllas – sadjásaš skuvlalanjat ordnašuvvamin, muhto eai buohkaide

Anára skuvlla rektor Marja Seilonen sávvá anárlaččain cavgilemiid, jus geas nu gávdnojit skuvladoaimmaide heivvolaš sajit.

Inarin koulun rehtori Marja Seilonen
Anára skuvlla rektor Marja Seilonen. Govva: Vesa Toppari / Yle

Anára skuvlla oahppiid vánhemat eai leat doapman váldit mánáideaset eret skuvllas sisáibmováttisvuođaid geažil. Anára skuvlla rektor Marja Seilonen muitala, ahte skuvlla 130 oahppis dušše moattis leat sirdásan ruoktoskuvlii, go eai bastte leat skuvlavisttis.

Anára skuvla lea goit sádden vánhemiidda dieđu mo galgá doaibmat, jus mánná buohcá sisáimmu geažil iige bastte leat skuvlavisttis.

– Jus mánná buohcá skuvlabeivviid áigge, de vánhemat berrejit váldit oktavuođa skuvladearvvašvuođadivššárii ja skuvladoaktárii, ávžžuha Seilonen.

Seilonen deattuha, ahte jus mánná váldojuvvo ruoktooahpahussii doaktáraduođaštusa haga, de ovddasvástádus oahpahusa ordnemis lea vánhemis.

– Áššis ferte soahpat dalle skuvllain ja oahpaheaddjiin. Dilli lea eará jus skuvladoavttir lea mearridan mánnái guhkkit buohcciluomu. De gal skuvla ferte fuolahit, ahte oahppi ii govssahala ja oahpaheaddji sáhttá fitnat ruovttusge vaikko oktii vahkkus, muitala Seilonen.

“Jáhkkimis sadjásaš skuvlalanjat ordnašuvvet jođánit”

Mannan vahkkus čielggai, ahte Anára skuvllas leat duođalaš sisáibmováttisvuođat. Mihtidemiin leat gávdnan alla minerálaullomeriid ja mikrobaid. Anára gielda leage dál olles leavttuin ordneme sadjásaš skuvlalanjaid dakkár oahppiide, geat reagerejit garrasit ja buhcet heajos sisáimmu geažil.

– Oalle guhkás leat jo ollen dáinna ja jáhkkimis sadjásaš skuvlalanjat ordnašuvvet jođánit. Mii fertet vuoruhit dakkár mánáid, geat buhcet eanemus. Dálá dilis eat goit sáhte buot oahppiide gávdnat sadjásaš skuvlavistti Anára márkanis, dadjá Seilonen.

Anára skuvlla rektor Marja Seilonen goit sávvá anárlaččain cavgilemiid, jus geas nu gávdnojit skuvladoaimmaide heivvolaš sajit.

– Dieđusge jus lea diehtu sadjásaš sajiin dahje visttiin Anára girkosiiddas, de mii áinnas sávvat, ahte olbmot váldet oktavuođa gildii, ávžžuha Seilonen.

Anára gielddahoavda Toni K. Laine muitalii Yle Sápmái vuossárgga, ahte son lea álggahan gielddas Anára gili ođđa skuvla-beaiveruoktodálu huksenproseassa válmmaštallama.

Varrasamosat: Sápmi

Váldoođđasat

Varrasamosat

Muualla Yle.fi:ssä