Koe uusi yle.fi
Sápmi |

Anára skuvlamánát vurdet jo juovlaluomu - "Somámus lea beassat herkostallat ja rahpat skeaŋkkaid"

Maid Anára girkosiidda 1. ja 2. luohkkálaččat áigot bargat juovlaluomus? Loga das mánáid jurdagiid ja sávaldagaid!

Elen Aina ja Áilu
Elen-Aina ja Áilu, 2.lk. Govva: Yle / Xia Torikka

– Áiggun stoahkat olgun ja vuodjit mohtorgielkkáin. Mus lea iežan gielká. Juovlaskeaŋkan lean sávvan giehtadiimmu ja herskuid. Háliidan herskostallat juovllaid áigge, muitala Áilu.

Elen-Aina fas liiko issoras olu juovllaide, go dalle oažžu skeaŋkkaid ja beassá maiddái addit skeaŋkkaid olu.

– Min bearrašis láve leat juovllaid áigge dakkár juovlavuorbádeapmi. Dalle mii váldit báberláhpo ja dat gean namma das lea, de dasa de ferte addit iežas skeaŋkka. Munnje bođii mu unnaoappáš. Mu stuorraoabbá fas addá munnje skeaŋkka ja mu eadni addá skeaŋkka mu stuorraoabbái ja mu áhčči fas eadnái. Ja mu unnaoappáš addá áhččáiges skeaŋkka. Mun liikon juovllaide olu, dadjá Elen-Aina.

Sulo ja Áile-Saara, 2.lk.
Sulo ja Áile-Saara, 2.lk. Govva: Yle / Xia Torikka

– Mun áiggošin leat bearrašiin ja borrat juovlabiepmuid. Mii áigut maid dahkat juovlačájálmasa. Áiggun maid áhči luhtte fitnat Helssegis, muitala Áile-Saara.

Sulo gal ii áiggo reiset gosage.

– Juovllaid áigge áiggun vuodjit gielkkáin, inge áiggo vuolgit gal guhkkelii.

nuppu ja jasmin
Jasmin ja Nuppu-Maaria, 2.lk. Govva: Yle / Xia Torikka

Nuppu-Maaria vuordá juovlastálu.

– Mun áiggun leat juovllaid ruovttus bearrašiin ja odne áigutge čiŋahit juovlamuora. Dieđusge maid herskostallat, liikon šukoláda borrat, muitala Nuppu-Maaria.

Jasmin áigu leat ruovttus bearrašiin.

– Áiggun borrat ruoná spáppaid. Mis lea dakkár vierru ruovttus, ahte mii mánát mannat eará latnjii ja dan botta eadni ja áhčči čiehkaba skeaŋkkaid, muitala Jasmin.

nilla asla ja sammeli
Sammeli ja Nilla-Asla, 2.lk. Govva: Yle / Xia Torikka
Nilla-Asla fas áiggošii veháš vuolgit guossástallat ja galledit fulkkiid.

– Juovllaid áigge áiggun mannat Guhtturii ja de dieppe Vuohččui. Guhtturis orruba áddjá ja viellja ja Vuohčus fas goaski, Joavnna ja oambealit, muitala Nilla-Asla.

Sammelis gal leat maid čielga plánat juovllaide.

– Mun áiggun mannat Gápmasii ja doppe de áiggun vuodjit gielkkáin, muitala Sammeli.

maia ja sarelle
Sárelle, 2.lk. ja Maia, 1.lk. Govva: Yle / Xia Torikka
Maia fas vuordá beassat láibut bihpporgáhkuid.

– Bihpporgáhkut leat buoremus juovlaherskot. Mun háliidan maid rahpat skeaŋkkaid ja leat olgun. Háliidan leat ruovttus juovllaid, dadjá Maia.

Sárelle fas áiggošii hervet juovlaguosa.

– Háliidan maid borrat ja rahpat skeaŋkkaid. Mu mielas maid leat bihpporgáhkut buoremus juovlaherskot. Áiggošin fitnat Giemas maid juovllaid áigge, muitala Sárelle.

nilsmatias ja mube
Mubemihkkal ja Nils-Matias, 1.lk. Govva: Yle / Xia Torikka
Nils-Matias áigu speallat juovlaluomus.

– Dieđus áiggun stoahkat maid. Lea somá oažžut skeaŋkkaid. Jáhkán, ahte juovlastállu buktá munnje legoid, dadjá Nils-Matias.

Mubemihkkal fas áiggošii juovllaid áigge stoahkat legoguin.

– Háliidan maid borrat herskuid. Mun vuorddán skeaŋkkaid hui olu. Jáhkán, ahte juovlastállu buktá munnje dan maid juo lean sávvange, dadjá Mubemihkkal.

Elle Matilda ja Uula, 1.lk.
Elle Matilda ja Uula, 1.lk. Govva: Yle / Xia Torikka
Elle-Matilda sávvá skeaŋkkaid.

– Vuorddán hui olu juovlastálu. Liikon borrat ruoná spáppaid, dat leat nu njálgát, rábmosta Elle-Matilda.

Uula fas áiggošii oađđit juovlaluomus.

– Mun áiggun juovlaluomus stoahkat legoguin ja oađđit. Lea somá go ii dárbbaš lihkat skuvlii. Vuorddán, ahte beasan juovlaherskuid borrat. Eandalit risenbuvrru liikon borrat, muitala Uula.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä