Koe uusi yle.fi
Sápmi |

Anára skuvlla rektor njuike skuvlebeŋkkii – "Giellamáhttu rahpá ođđa uvssaid"

Anára skuvlla rektor Ilkka Korhonen njuikesta boahttevaš jahkái skuvlabeŋkkii ja lohkagoahtá anárašgiela. – Jáhkán, ahte giellamáhttu boahtá leat munnje stuorra ávkin rektora ámmáhis, oaivvilda Korhonen.

Ilkka Korhonen
Ilkka Korhonen Govva: Anja Kaarret / Yle

Anára skuvlla rektor Ilkka Korhonen njuikesta boahttevaš jahkái skuvlabeŋkkii ja lohkagoahtá anárašgiela Sámi oahpahusguovddážis.

– Hui rabas mielain vuolggán oahppat anárašgiela, dat lea lávki ođđa bálgáide. Anárašgiella lea Anára guovllu sámegiella ja go lean dáppe riegádan, de dat orui hui lunddolaš lohkagoahtit dan, muitala Ilkka Korhonen.

Skuvlejumis leamašan dál jagi boddu, muhto boahtte čavčča anárašgiela skuvlejupmi fas beassá fártii. Korhonen ii leat nu oahpis anárašgillii iige leat lohkan ovdal makkárge sámegiela, maid dál lea dušše skuvlamáilmmis gullan sániid duoppil dáppil.

– Beaivválaččat gal gulan anárašgiela skuvllas ja juoidá mahkáš ipmirdange, muhto in álot leat gal árvidan riekta, bohkosa Ilkka Korhonen.

"Giellamáhttu rahpá ođđa uvssaid"

Anára skuvlla rektor Illka Korhonen sávvá iežas máhttit jagi geahčen jo juogaláhkái anárašgiela. Korhonen jáhkká, ahte giellamáhttu lea ávkin rektora barggus.

– Sávan, ahte dat skuvlejupmi rahpá ođđa uvssaid ja viiddida mu oainnuid ja jurdagiid jo rektora barggu dáfus. Dat lea jur dat sivva manne hálidin vuolgit skuvlejupmái mielde. Jáhkán, ahte das lea stuorra ávki rektora ámmáhis, dadjá Ilkka Korhonen.

– In gal bala vuolgit skuvlii, muhto leavssuid birra lean moddii jo jurdilan, mieđiha Korhonen ja boagusta.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä