Sápmi |

Anára vuovdesoahpamuš leamaš fámus guhtta jagi – Ovttasbarggu ovdáneamis leat máŋggalágan oainnut

Anára guovllus leat boazodoallit ja vuovdeindustriija guhtta jagi dassái soahpan, guđe guovllus stáhta oažžu čuohppat vuovddi. Meahciráđđehusa mielas soahpamuš lea buoridan gulahallama boazodoaluin, muhto boazodoallit eai leat áibbas ovtta oaivilis áššis.

Video: Govva bigálusain Čivttajogas Muttošjávrri bálgosis.

Guhtta jagi dassái, jagi 2010, sohpe ahte Suoma stáhta Meahciráđđehus ii čuohpa vuvddiid Anára guovllu bálgosiid dehálaš guohtuneatnamiin 20 jahkái.

Vuovdečuohppamiin vástideaddji Meahciráđđehus leamaš duđavaš soahpamuša bohtosiidda. Davimus Suoma vuovdedoallohoavda Pertti Heikkuri mielas soahpamuš lea buoridan vuovdedoalu ja badjeolbmuid ovttasbarggu ja gulahallama.

– Mu mielas ovttasbargu lea dahkkojuvvon soahpamušaid maŋŋá doaibman bures. Soahpamuš sisttisdoallá nu vuđolaččat dahkkon, oktasaččat sohppojuvvon njuolggadusaid. Erenoamážit mearreáigái ráfaidahtton guovllut leat dehálaččat boazodollui, dat lea sihkkarit váikkuhan áššái, Heikkuri smiehttada.

Boazoisit: Meahciráđđehus čuohppá menddo soahpamušguovllu olggobealde

Buohkat eai leat goit leamaš seamma duđavaččat ovttasbargui.

Osmo Seurujärvi
Govva: Yle Sápmi
Anára Muttošjávrri bálggus lea dán giđa garrasit moaitán Meahciráđđehusa doaimmaid bálgosa eatnamiin.

Boazoisit Osmo Seurujärvi mielas Meahciráđđehus lea dulkon soahpamuša nu, ahte sii ožžot soahpamušguovllu olggobealde čuohppat nu ollu go hálidit ja dan ii boazodoallu gierdda.

– Mu mielas dat čuhppet menddo garra gieđain. Midjiide eai báze eatnamat ollenge. Meahciráđđehus ii maiddái leat dieđihan čuohppamiin doarvái buriin áiggiin, Seurujärvi cuiggoda.

Meahciráđđehus šiitá čuoččuhusaid

Pertti Heikkuri
Govva: Yle Sápmi
Meahciráđđehusa vuovdedoallohoavda Pertti Heikkuri muitala, ahte sii leat imaštallan boazodoalliid čuoččuhusaid menddo viiddis čuohppamiin.

Heikkuri lohpida, ahte sii čielggadit ášši Muttošjávrri bálgosiin.

– Mii leat imáštallan dáid ságaid. Muhto mii ságastallat vuđolaččat dáid áššiin bálgosa ja Meahciráđđehusa gaskasaš ráđđádallamiin boahttevuođas.

Suoma luonddusuodjalanlihttu: Vuovdečuohppamiidda dáppe eai leat buorre ákkat

Anára bálgosat leat leamašan fuolas earret eará bohccuide divrras lahppu jávkamis boares vuvddiid čuohppamiid dihte.

Paloma Hannonen
Govva: Yle Sápmi

Go lea sáhka sámi rašes luonddus, lea Suoma birasorganisašuvdnage buktán ovdan iežas fuola áššis.

Luonddusuodjaleaddjit, earret eará Suoma luonddusuodjalanlihtu suodjalanáššedovdi Paloma Hannonen, oahpásmuvve álgovahkus Anára vuovdečuohppamiidda Muttošjávrri bálgosa guovllus.

– Dát lea dehálaš guovlu boazodollui ja danin mun ádden sin fuola. Dán guovllus vuovddit ođasmuvvet ja šaddet nu njozet, ahte mu mielas stuorra vuovdedoallodoaimmaide lea váttis gávdnat buorre ákkastallamiid, Hannonen dadjá.

Varrasamosat: Sápmi

Váldoođđasat

Varrasamosat

Muualla Yle.fi:ssä