Koe uusi yle.fi
Säämi |

Anarâš-lostâ lii uđâsmittem vyeln – uđđâ toimâtteijee, eenâb čälleeh já jurduuh nettitooimâst

Anarâš-loostâ toimâtteijee Eljas Niskanen lii hundârušmin Anarâš-loostâ puátteevuođâ, já tuáivu meid lohhein jurduid já iävtuttâsâid.

Jietna: Eljas Niskanen
Jietna

Eljas Niskanen lii kesimáánu rääjist toimâttâm Anarâš-loostâ, ko kuhesáigásâš váldutoimâtteijee Ilmar Mattus lii päcimin kuuloold iäláttâhân Anarâš-loosta tooimâtmist.

Niskanen lii ovdil porgâm toimâtteijen Yle Säämist. Tääl ko sun lii toimâm pelnub mánuppaje Anarâš-loostâst, sust láá jo mottoommuđusiih vuáváámeh loostâ uđâsmittem várás. 

Tuáivu eenâb čälleid

Ohtâ čielgâ ulme lii movtijdiđ ovtâskâs ulmuid čäälliđ loostân.

– Lii lamaš ennuv saahâ tast, ete kolgâččij kuuloold toimâttiđ tagaráin vuovvijn taam loostâ, ete lohheeh jiejah-uv čáláččij ennuv čuuvtij eenâb ko taan räi, Niskanen iätá.

Niskanen lii tääl jieš čáállám mottoom verd čoovčâ nummeer várás, mutâ juurdân sust ličij šoddâđ eenâb-uv editisten já keevâtlij aašij uárnejeijen.

– Te mun viigâm toos, ete mun jiem tarbâšiččii ko muáddi taggaar kuhheeb muštâlus ovdâmerkkân, teikkâ muáddi taggaar viijđásub ääši čáláččim jieš, já talle puáđáččii eenâb tain ulmuin toh čalluuh tuođâi, Niskanen muštâl.

– Niskanen lii njuolgist tiilám ulmuin čalluid tiätu fáádáin, maid jieš uáináččij heiviimin loostân.

– Puohah iä lah ubâ aanaarkielâg ulmuuhkin. Jis mun tiäđám ete mottoom vâik orjâlâškielâg olmooš tiätá mottoom ääšist, mátáččij pyereest, te mun lam njuolgist pivdám sii čäälliđ talle. Mun tuše jurgâlistám talle aanaarkielân .

Kii peri uážžu kale čäälliđ meid jieijâs fáádást Anarâš-loostân. Puáttee numerân kiergân vuolgâttiđ čalluid val syeinimáánu loopâ räi. 

Ennuv uđđâ ääših

Niskanen muštâl, ete äigi uđđâ pargoost lii moonnâm čäällimpargo lasseen keevâtlij aašij máttááttâlmân. Päävirloostâ tooimâtmist láá jieijâs uđheh.

– Ylest ovdâmerkkân ko nettiuđđâsijd čáálá, te tot lii aaibâs eres hommá ko ij taarbâš väldiđ maiden taid printtimaašijd vuotân mongin náál. Ovdâmerkkân tot ete loostâst kalga leđe tiätulágán sijđomeeri ovdâmerkkân ko mudoihân tast pásáččij ovdâmerkkân tyehilokke meddâl.

– Tágáreh aaibâs oovtâkiärdánis ääših maid ij lah šoddâm talle nettitoimâtteijen smiettâđ, Niskanen luvâttâl uđđâ pargo háástuid.

Jurduuh meiddei nettiartikkâlijn

Internet lii taan ääigi uáli pehtilis vyehi juksâđ ulmuid já tieđettiđ aašijn jotelávt. Niskanen uáináččij mielâstis meid mottoomlágán nettitooimâ pááppárloostâ paaldâst, mutâ čielgâ jurduuh neeti iähtun iä vala lah.

– Tot lii váhá taggaar filosofisâš koččâmâš, ete maid Anarâškielâ servi kolgâččij porgâđ nettijn. Mun jiem kale jieš monâččij tom njuolgist meridiđ, ete tääl kolgâččij váhá ulmuin koijâdâllâđ tiäđust-uv.

– Halijdeh-uv lohheeh ovdâmerkkân tom ete ko lostâ kuittâg uáli harvii puátá, moddii, neljii ivveest, te kolgâččij-uv täst siämmást keččâliđ kuittâg meiddei pyevtittiđ váhá siämmáámuđusâš vuovvijn ko Yle. Motomijd äigikyevdilub aašijd pieijâđ neetin talle meid mottoom verd talle, ete tom ferttee váhá smiettâđ, Niskanen iätá.

Loostâ puátteevuotâ ij lah čielgâs

Eljas Niskanen uáiná kyehti muulsâiävtu Anarâš-loostâ puátteevuotân. Jo-uv ohtâ váldutoimâtteijee parga stuorrâ pargo jyehi nummeer oovdân, teikkâ loostâ lohheeh riemmih jiejah čäälliđ, jeđe mottoom pargee čuákkee loostâ. Niskanen jieš lii pálkkááttum toimâttâspaargon love mánuppajan.

Vuossâmuš muulsâiähtu váátá ruuđâ já ennuv ääigi oovtâ ulmust, nubbegis ennuv čälleid.

– Kale tot lii aaibâs lohhein kiddâ muu mielâst toin naalijn ete mahtsun sáttá keevvâđ talle puátteevuođâst taan loostân-uv, ete vala-uvks tot puátá kiđđâtäälvi numerij maŋa meiddei. Tast lii lohhein stuorrâ vaikuttemmáhđulâšvuotâ.

Varrasamosat: Säämi

Váldoođđasat

Bivnnuhamosat

Varrasamosat

Muualla Yle.fi:ssä