Säämi |

Anarâš -nettilostâ almostuumin já puáris Anarâšloostah tuuvnán

Anarâškielâ servi almostiškuát nettiloostâ, jis uážžu ruuđâ. Puáris pááppárloostâid uážžu val táttuđ olssis, loopah maneh tuuvnán.

Jietna: Anarâškielâ seervi mediapargee Eljas Niskanen.
Jietna
Anarâškielâ seervi mediapargee Eljas Niskanen.

Anarâškielâ servi lii uuccâm ruttâdem nettiloostâ almostitmân máttááttâs- já kulttuurministeriöst. Vuosmuš lostâ almostuvvoo taan vyesimáánu loopâst, veik ruttâ ij puáttee lostáid kavnuuččiigin, muštâl seervi mediapargee Eljas Niskanen.

– Jis ruttâdem puátá, te ulmen ličij almostittiđ kuohtii, kulmii máánust taan nettiloostâ, muštâl Niskanen.

Jis Anarâškielâ servi uážžu nettiloostâ várás ruuđâ, te taat meid meerhâš tom, et oppeet lii seervist pargosaje áávus. Mudoi-uv servi taarbâš uđđâ mediapargee, ko tááláš, Eljas Niskanen, lii päcimin pááikán puáttee ive aalgâst päikkieeččin.

– Jis taat luhostuvvoo, te kiinii eres-uv smietâškyettiđ, et pastaišij -uv porgâđ taan pargo, áávžud Niskanen.

Nettiloostân lii tárbu, mut puáris Anarâšlostâ ij lappuu kuussân, loppeed Anarâškielâ seervi mediapargee.

Puáris Anarâš-loostah tuuvnán

Anarâškielâ seervist lii Anarâšlostâ almostum jo paijeel 30 ihheed. Tai ivij äigin loostah láá čokkášum suullân 500 kiilud. Tääl servi juáhá taid loostâid toid, kiäh taid halideh. Loopah maneh tuuvnán. Tääl taah loostah láá Eljas Niskanen pargoloonjâst, mut tohon toh iä pääsi.

– Taid lii ulmen talle skeŋkkiđ ovdâskulâi. Toh puáris Anarâšloostah, maid kihheen ij huolâ, te maaneeh ruskijd, muštoot Niskanen.

Loostah láá kuittâg pieijum digivuárkán, nuuvt et toh iä tuššân lopâlávt, veik pááppár loostah tuššeh-uv.

Puáris Anarâšloostâid puáhtá koijâdiđ Anarâškielâ seervi mediapargee Eljas Niskasist.

Varrasamosat: Säämi

Váldoođđasat

Varrasamosat

Muualla Yle.fi:ssä