Säämi |

Anarâš kandâ párnái jiečânâsvuođâpeeivi juuhlân Helsigân

Jalmari Mäenpää lii puávdejum párnái jiečânâšvuođâpeeivi juuhlán, mii uárnejuvvoo Suomâ100-juhleive kunnen viiđâd peeivi juovlâmáánu. Suomâ jyehi kundáást kyehti, ive 2007 šoddâm párnáá uásálistev juuhlán. Juhle čáittoo televisiost.

Jalmar já suu enni Iiris Mäenpää valjiv mááccuhläđđee
Jalmar já suu enni Iiris Mäenpää valjiv mááccuhläđđee Govva: Mikkal Morottaja / Yle

– Tylsää. Jiem mun vaje moonnâd tyeggáár juhlijd, jurdâččij Jalmari vuoččin, ko uážui povdiittâs. Sun ij tieđe, maht já kii lii suu tohon valjim. Ohtuu sun ij kuittâg taarbâš vyelgiđ máátkán, ko enni miäđušt suu juhlesaje uuksân. Enni ij peesâ jieš juuhlán pic sun kalga vyerdiđ ulguubeln. Aanaar kundá nubbe ovdâsteijee puátá meiddei Aanaar škoovlâst.

Uđđâ juhlemááccuh

Jalmari iätá, ete suu enni kuárru sunjin juhlepivtâsin ärbivuáválii mááccuh, mon ivneh láá čappâd, ruánáá, fiskâd já ruopsâd.

Jalmari ij lah uážžum ravvuid, ete maid juhleest kalga porgâđ. Sun kuittâg tiätá, ete Suomâ president ij puáđi tohon pic Juha Sipilä já eres illâttâsoovdânpyehteeh. Jalmari moovtásk, ko sun muštâl, ete tobbeen láá čižžâm visteest herskupeevdih. Sun miätá, ete lii váhá jierestum juhle tiet.

Jalmari enni, Iiris Mäenpää lâi kuullâm valjiimist jo ovdil ko reivâ poođij. Aanaar škoovlâ rehtor, Elle-Maarit Näkkäläjärvi lâi uážžum kieldâst pargon valjiđ párnáid já lâi koijâdâm jo muuneeld, ete vuálgáččij-uv Jalmari já peessâv-uv vanhimeh kaandâ fáárun.

Korrâ valmâštâlmeh

Iirisist määđhi valmâštâlmáid lii kuullâm hootel- já kirdemliipuid tiilám já uđđâ mááccuh kuárrum. Olssis sun ij tääl taarbâš kuárruđ, ko sun páácá uuvsâi ulguubel. Juhle pištá muáddi tiijme. Ton maŋa lii väzzim kinttâlijguin Siätutáálust president lane kuuvl, kost lii almolâš juovlâčuovâi cokkiittemtilálâšvuotâ.

Stuorrâ já hitruus reissu

Iiris vuálgá olgijnis kuávttáá. Suoi vyelgiv masa oho ovdil juhle, ko áiguv eelliđ Tamperest vistig.

– Koolgâi váhá maidnii hitruid sunjin lopediđ, iätá Iiris já iilood, ko lii máhđulâšvuotâ siämmáá määđhist eelliđ skipárijd teivâdmin. Sun arvâl, ete muádi ive keččin Jalmari-uv jo huámmáš taan juhle áárvu já tom, ete tágáreh iä puáđi távjá ige juáhážân.

Jalmar já Iiris sahhiittâllâm kulâmist täst.

Čallum háámán heiviittâm Anna Morottaja.

Varrasamosat: Säämi

Váldoođđasat

Varrasamosat

Muualla Yle.fi:ssä