Säämi |

Anarâš kokkâ Heikki Nikula oovdâst Säämi Kanadast purrâmâš-filmâfestivaalist – ärbivuáválâš steikkâ šoodâi kode piärgust

Devour purrâmâš-filmâfestivaalist lii taan ive algâaalmug teema. Festivaalist láá algâaalmug kookah ovdâmerkkân Säämist, Kuubast já Kanadast.

Keittiömestari Heikki Nikula
Kokkâ Heikki Nikula illood ko piäsá mälistiđ Kanadast purrâmâš filmâfestivaalist. Jieht purrâmâšrallist lijjii tuhháát olmožid purâmin sii heerskuid. Govva: Vesa Toppari / Yle

Aanaar Kollehovi kokkâ Heikki Nikula oovdâst Säämi Kanadast Devour purrâmâš-filmâfestivaalist. Festivaal uárnejuvvoo jyehi ive Kanadast ja taan ive festivaalist lii algâaalmug teema.

– Sij lijjii perustum uážžuđ sämmilâš kookâ. Sij valdii ohtâvuođâ Sämitiigán já tobbeen ettii, ete mun puávtáččim leđe hiäivulâš kokkâ, Nikula povvust.

Stuárráámus pargo lâi jieht, ko čiččâm kokkâd mälistii purrâmâšrallist tuhháát ulmui. Nikula mälistij steeihâ já sälttikyele ruvâšleeibi alne. Steeihâ piärgu ij kuittâg lamaš poccust, mutâ koddeest.

– Kalehân tot ličij lamaš njálgásub, mutâ ij tast liččii lamaš mihheen jiermijd 70 kiilud fievridiđ meerâ tuáhá, arvâl Nikula.

Nikula muštâl, ete purrâmâšrallin uásálistii ennuv ulmuuh já ulmuuh lijjii perustum smakkiistiđ sii purrâmâšâid.

Nikulan lii tergâd peessâđ oovdânpyehtiđ sämmilij kulttuur

Heikki Nikulan lii tehálâš taan määđhist peessâđ oovdânpyehtiđ sämmilij kulttuur já teivâđ eres algâaalmug kokâigijn. Sunjin taat lii fijnâ feerim.

– Tääbbin láá algâaalmugeh Kuubast, Kanadast, Amerikast já Karibiameerâst. Siiguin lii lamaš suotâs porgâđ já peessâđ jyehiđ uáivilijd maaŋgâ-uv ääšist, illood Nikula.

Maŋeláá taan ohhoost Nikula piäsá mälistiđ oovtâ fiilmâ várás. Sist lii puátimin val purrâmâšpargopáájá já loppâohhoost sun piäsá mälistiđ Aanaar-raavvâdviäsu purrâmâšâid.

Nikula lii tääl vuosmuu keerdi Kanadast, mutâ sun ij lah kiergânâm ennuv vuoiŋâstiđ, ko sij láá porgâm kuhes pargopeeivijd. Anarân pááikán sun puáhtá tulijâžžân vääđirsiirááp já siider.

Kuldâl maid Heikki Nikula muštâlij sahhiittâlmist. Jietna: Anja Kaarret / Yle

Kuldâl lase anarâš saavâid tääbbin.

Varrasamosat: Säämi

Váldoođđasat

Varrasamosat

Muualla Yle.fi:ssä